«Aqjaıyq» tabıǵı rezervaty Atyraý oblysy ákimdiginiń balansyna berile me

ASTANA. QazAqparat – Premer-Mınıstrdiń birinshi orynbasary Roman Sklıar Májilis depýtattarynyń «Aqjaıyq» tabıǵı rezervatyn Atyraý oblysynyń ákimdigi balansyna berý jónindegi saýalyna resmı jaýap berdi, dep habarlaıdy QazAqparat tilshisi.

«Aqjaıyq» memlekettik tabıǵı rezervatyn Atyraý oblysynyń ákimdigi balansyna berý úshin respýblıkalyq mańyzy bar sanatynan mártebesin tómendetip jergilikti mańyzy bar sanatyna aýystyrýdy talap etedi. Joǵaryda aıtylǵannyń negizinde jáne Qazaqstan Respýblıkasynyń Erekshe qorǵalatyn tabıǵı aýmaqtar týraly zańynyń 14-babynyń, 6-tarmaǵyna sáıkes «Erekshe qorǵalatyn tabıǵı aýmaqtardy «respýblıkalyq mańyzy bar» sanatynan «jergilikti mańyzy bar» sanatyna aýystyrýǵa jol berilmeıdi», - delingen Roman Sklıardiń jaýabynda.

Úkimet basshysy birinshi orynbasarynyń dereginshe, «Aqjaıyq» rezervatyna 2023-2027 jylǵa materıaldyq tehnıkalyq bazasyn jaqsartýǵa 975 760 myń teńge qarajat qarastyrylǵan.

Onyń ishinde 2023 jylǵa – 303 943 myń teńge, 2024 jylǵa – 150 356 myń teńge, 2025 jylǵa – 150 356 myń teńge, 2026 jylǵa – 150 698 myń teńge, 2027 jylǵa 220 407 myń teńge kózdelgen.