Aqjarqynnyń anasy: Meniń júregim senimen birge dep bil, janym
«Aqjarqynym, altynym, esh ýaıymdama! Bári jaqsy bolady, Qudaı qalasa, az qaldy. Advokattaryń da jaqsy jumys istep jatyr. Olardy da Qudaı aldarynan jarylqasyn! Bizge jasaǵan jaqsylyqtary Qudaıdan qaıtsyn deımiz. Janym-aý, altynym-aý ár adamnyń ózine bersin, peshenesine bersin! Altynym, kúnim, aqylym seni qatty jaqsy kóremin. Sen ony bilesiń. Atańnyń, apańnyń, anańnyń júregi senimen birge dep bil, janym. Bárimiz seni saǵynyp otyrmyz. Erterek oralarsyń úıge. Qudaı qalasa, bári jaqsy bolady», - deıdi Aqjarqynnyń anasy aýdıo jazbasynda.
Aıta keteıik, QHR Gýandýn provıntsııasy Gýanchjoý qalasynyń birinshi satydaǵy sotynda Aqjarqyn Turlybaıdyń isin qaıta qaraý bastaldy. Otyrysqa úsh sýdıa, eki aıyptaýshy, eki qytaılyq advokat jáne qazaqstandyq advokat Suńqar Nurmaǵambetov, QR-dyń QHR-daǵy Elshiligi konsýldyq bóliminiń jetekshisi Bolat Syrlybaev, aýdarmashy, stenografıst, eki jasaýyl, Aqjarqyn Turlybaı jáne QHR akkredıttelgen «QazAqparat» HAA jáne "Habar 24", "Habar" jýrnalısteri qatysýda.
Eske sala keteıik, 21 jastaǵy qazaq qyzy Aqjarqyn Turlybaı 2014 jyldyń naýryz aıynda Qytaıdyń Malaızııamen shekarasynda esirtkimen ustalǵan bolatyn. Onyń júk sómkesinen 4,5 keli esirtki tabyldy, Aqjarqyn ol týraly bilmeıtinin málimdegen. Osy is boıynsha Qytaıdyń Gýanchjoý soty Aqjarqyn Turlybaıdy esirtki kontrabandasymen aınalysty dep aıyptap, ómir boıyna bas bostandyǵynan aıyrdy. 2016 jyly 7 sáýirde apellıatsııalyq satydaǵy sot Aqjarqyn Turlybaıdyń ómir boıyna bas bostandyǵynan aıyrý jazasyn ózgertý jáne isti birinshi satydaǵy sottyń qaraýyna jiberý týraly qaýly etti.