Aqjarqyn Turlybaıǵa úkim shyǵatyn kún áli belgisiz

BEIJІŃ-GÝANChJOÝ. QazAqparat - Esirtki tasymaldaǵany úshin Qytaıda isti bolǵan qazaqstandyq Aqjarqyn Turlybaıǵa qatysty sot úkimi shyǵatyn kún áli belgisiz. Bul týraly QR-nyń QHR-daǵy elshiliginiń konsýldyq bólim jetekshisi Bolat Syrlybaev «QazAqparat» HAA-nyń  Qytaıdaǵy menshikti tilshisine bergen suhbatynda habarlady.

«Qazir qytaılyq sýdıalar da, qytaılyq advokattar da Aqjarqynǵa qatysty sot úkiminiń naqty kúnin atamaı otyr. Men olarmen úzdiksiz baılanystamyn. Qazaqstandyq advokat meniń qatysýymmen qytaılyq advokattar men sýdıalarmen sóılesýde», - dep aıtty ol Suńqar Nurmaǵambetovtiń úkimniń naqty kúnin - 27-28 aqpan dep ataǵanyna tańǵalyp. Dıplomat búgin Gýanchjoýdaǵy tergeý oqshaýlaǵyshynda Aqjarqynmen kezdesip, 40 mınýttaı sóılesken.

Onyń aıtýynsha, qyzdyń kóńil kúıi jaqsy. Aldaǵy mereke kúnderi jumysqa shyqpaı, ózimen birge kamerada otyrǵan 16 adammen birge bolady.

«Aqjarqyn tergeý oqshaýlaǵyshynda jumys jasaıdy - ol qolǵaptar men basqa da buıymdardy paketterge salyp, qaptaıdy. Aqjarqyn kún saıyn Qytaı telearnalaryndaǵy jańalyqtardy qarap otyrady (kúnine 1-1,5 saǵat qaraýǵa ruqsat beriledi). Ol kelesi joly otbasylyq sýretti berip jiberýin ótingen. Kózildirik máselesi sheshimin tapty. Burynyraq kamerada ystyq sý bolmady. Ol másele de sheshildi», - dep habarlady B.Syrlybaev.

 Dıplomat aqpanda kele jatqan týǵan kúnimen quttyqtap, kartochkasyna azyraq aqsha salǵan. Búgin qazaqstandyq konsýl Gýanchjoý qalasynda tutqyndalǵan  QR-dyń  úsh azamatymen kezdesedi.

Eske sala keteıik, Aqjarqyn Turlybaı 2014 jyldyń naýryz aıynda Gýanchjoý áýejaıynda 4,5 keli esirtkimen ustalǵan bolatyn.

Ol Malaızııaǵa sándi kıimderdiń kýreri bolyp jumys jasaýǵa attanǵanyn aıtyp ketken. Qyzdyń ózi esirtkini oǵan arandatýshylar salyp jibergenine senimdi.

Bul iske qatysty Qytaı soty aýyr jaza taǵaıyndap, ony ómir boıy bas bostandyǵynan aıyrǵan bolatyn.

Alaıda keıin, Esirtki, psıhotropty zattardyń zańsyz aınalymymen kúres Ortalyq Azııalyq aımaqtyq ortalyǵy jas qyz nıgerııalyq esirtki mafııasynyń qurbany bolýy múmkin ekenin aıtqan.

2016 jyldyń 7 sáýirinde apellıatsııalyq sot satysy Aqjarqyn Turlybaıdy ómir boıy bas bostandyǵynan aıyrǵan sot úkiminiń zańdy kúshin toqtatyp, alǵashqy sot satysyna isti qaıta qaraý týraly qaýly shyǵarǵan.