«Aqjar adamdary alańdaýly»- baspasózge sholý
***
«Egemen Qazaqstan» gazetiniń jazýynsha, Premer-Mınıstrdiń birinshi orynbasary Baqytjan Saǵyntaev «Baıqońyr» kesheniniń 60 jyldyǵyna arnalǵan is-sharalarǵa qatysty. Qaza tapqan synaqshy-jaýyngerler memorıalyna gúl shoqtaryn qoıǵannan keıin Baqytjan Saǵyntaev resmı saltanatqa qatysty, sondaı-aq, qala turǵyndaryn, Baıqońyr ǵarysh aılaǵy qyzmetkerleri men ardagerlerdi mereıtoılyq datamen quttyqtady. Baıqońyr ǵarysh aılaǵynyń tarıhı jáne ǵylymı-tehnıkalyq mánin sezine otyryp, Qazaqstan men Reseı ony saqtap qala bildi jáne ony odan ári damytý boıynsha jumystardy jalǵastyrýda. Qazaqstan men Reseı Federatsııasy prezıdentteriniń qoldaýynyń arqasynda ǵarysh aılaǵy álemdik kosmonavtıka damýynyń alǵy sapynda qalyp, ǵylymı-tehnıkalyq progrestiń sımvoly, eki el arasyndaǵy ózara tıimdi yntymaqtastyqtyń jarqyn kórinisi retinde qyzmet etýde, dep atap ótti Premer-Mınıstrdiń birinshi orynbasary. Baqytjan Saǵyntaev, sondaı-aq, Reseı Federatsııasy Úkimeti Tóraǵasynyń orynbasary Dmıtrıı Rogozınmen kelissózder ótkizip, onyń barysynda «Baıqońyr» keshenin odan ári damytý máseleleri, qazaqstandyq ǵaryshkerdiń halyqaralyq ǵarysh stansasyna ushýyn josparlaýdyń mán-jaıy, «Báıterek» jáne «Dnepr» baǵdarlamalarynyń perspektıvalary talqylandy. Bul materıal «Baıqońyr 60 jyldyǵyn atap ótti» degen taqyryppen oqyrman nazaryna usynylyp otyr.
Bas basylymdaǵy «Túıtkildi máseleler sheshimin tabady» atty maqalaǵa aýyl sharýashylyǵy máselesi arqaý bolǵan. Elbasy usynǵan 100 naqty qadamnyń 61-inde et óndirisi men óńdeýdi damytý úshin strategııalyq ınvestorlardy tartý kerektigi aıtylǵan. Bul jóninde bizdiń eldiń áleýeti joǵary, mal sharýashylyǵyn damytýda elimizdiń tabıǵı klımattyq jaǵdaılary mol múmkindik beredi. Qazirgi tańda aýylsharýashylyq salasy boıynsha 15 naqty joba kózdelip otyr. Bul jóninde Prezıdent janyndaǵy Ortalyq kommýnıkatsııalar qyzmetinde ótken baspasóz máslıhatynda Aýyl sharýashylyǵy mınıstri Asyljan Mamytbekov málim etti.
«Egemen Qazaqstan» gazetiniń búgingi sanynda «Aqjar adamdary alańdaýly» degen maqala berilgen. «Oı-shuńqyrly jolmen alystaǵy Aqjar aýylyna jetý de ońaı emes. Al respýblıkalyq mańyzy bar Aqsý-Kóktóbe-Aqjar jolynyń kúrdeli jóndeý jumystary jyldar boıy júrgizilýde. Polıgon synaqtaryn kórgen aýyl bir kezdegi jabyq qala Kýrchatovtyń dál janynda. Aýdannyń basqa aýyldary da jarylystan kóz ashpaǵan, dúmpýlerdiń surǵylt sýyq izi qalǵan jerler»,-dep jazady maqala avtory. Osy Aqjar aýylynyń máslesi jaıynda tolyq bilgińiz kelse, maqalany qarap shyǵyńyz.
***
«Aıqyn» gazetiniń jazýynsha, Ortalyq kommýnıkatsııalar qyzmetinde Parlament Májilisiniń depýtattary baspasóz máslıhatyn ótkizdi. Olar sybaılas jemqorlyqqa jol bermeýge jáne zaman talabyna saı kásibı memlekettik apparat qurýǵa qatysty is-sharalar júzege qalaı asyrylatynyn baıandady. A.Solovevanyń sózinshe, memlekettik qyzmetke qabyldaý 3 satyly júıeden quralady. Jańa júıe Memlekettik qyzmet isteri jónindegi agenttikte talqylanǵannan keıin merıtokratııalyq tásil arqyly oryndalady.
- Árbir memlekettik qyzmetker usynylatyn qyzmetine sáıkes irikteýden ótedi. Memlekettik qyzmetker jergilikti bılik organdarynyń birinshi deńgeıinen ótedi. Іrikteý budan keıin de jalǵasady. Bul memlekettik qyzmetkerler pýlynyń belgili bir «súzgisi» ispettes.
«100 naqty qadam» Ult jospary aıasynda aqparattyq qyzmetterdi biriktiretin korporatsııa qarastyrylyp otyr. Qazir Parlamentte osy tezısterdi júzege asyrý boıynsha top jumys istep jatyr, - dedi ol. Osy máseleni arqaý etken maqala basylymda «Kúrestiń kúsheıgeni kerek» degen taqyryppen jarııalandy.
Osy gazette Ulttyq biryńǵaı testileýge baılanysty «Armanyńnyń aq qusy jetelesin...» atty maqala berilgen. Keshe 2 maýsym kúni elimizde Ulttyq biryńǵaı test bastaldy. Synaq 8 maýsymǵa deıin jalǵaspaq. UBT-ǵa daıyndyq Qazaqstan Respýblıkasy Prezıdenti ákimshiligi men Qazaqstan Respýblıkasy Premer-Mınıstri keńsesiniń tikeleı baqylaýynda. Talaptardyń saqtalýy men test tapsyrmalaryn baǵalaý kezinde daý týyndaǵan jaǵdaıda, qatysýshylar apellıatsııaǵa qatysýǵa quqyǵy bar. Testileý merzimi kezinde UBT-ǵa qatysýshylardyń quqyǵyn qorǵaýdy qamtamasyz etý maqsatynda barlyq UBT ótetin beketterde apellıatsııalyq suraqtardy qarastyratyn respýblıkalyq komıssııa men apellıatsııalyq komıssııa jasaqtalǵan. Oblys ortalyqtarynda, Almaty men Astana qalalarynda UBT barysynda kókeıdegi kóp saýalǵa jaýap alý úshin UBT ótkizý jáne úılestirý shtabtaryna habarlasýlaryna bolady. Sondaı-aq QR BǴM janynda respýblıkalyq shtab jumys isteıtinin eskergenimiz jón.
***
«Ekspress-K» basylymynyń búgingi sanynda «I s togo sveta dostanem» degen maqala berilgen. Shymkentte polıtsııa qyzmetkerleri ózine qol jumsaýǵa talpynǵan jas qyzdyń ómirin aman alyp qaldy. Kópirden sekirýge áreket jasaǵan qyzdyń qandaı sebeptermen mundaı qadamǵa barǵandyǵy ázirge belgisiz.
«Kópirge jaqyndaǵan kezde kópir taıanyshynyń arǵy jaǵyna ótken qyzdy kózimiz shaldy. Ol uıaly telefonmen sóılesip jatqan eken, bizdiń jaqyndaǵanymyzdy baıqamaı qaldy. Bildirtpeı kelip qyzdy qolynan ustap úlgerdik. Sodan keıin ony jedel járdem dárigerleriniń qolyna tapsyrdyq»,-deıdi jol-patrýldik polıtsııa serjanty Ársen Ahmetov.