Aqyt Úlimjiulynyń 120 jyldaı buryn jarııalanǵan shyǵarmalarynyń túpnusqalary jaryq kórdi

ASTANA. QazAqparat - Іri ǵulama, dinı qaıratker, qazaq jazba ádebıeti negizin qalaýshylardyń biri, kórnekti aqyn Aqyt Úlimjiulynyń týǵanyna 150 jyl tolýyna oraı Mońǵolııada jańa kitap jaryq kórdi, dep habarlaıdy QazAqparat tilshisi.

Bul -  Aqyt jaıly zertteýler jáne osydan 120 jyldaı buryn Qazan qalasynda Shaǵataı álipbıinde jaryq kórgen shyǵarmalarynyń túpnusqalary qamtylǵan tuńǵysh kitap.

Atalǵan qundy shyǵarma mońǵolııalyq qandasymyz, tarıh ǵylymdarynyń doktory (Sc.D), professor, Qurmethan Muhamadıulynyń uzaq jyldyq eńbegi nátıjesinde oqyrmandarymen qaýyshqaly otyr eken.

«Mońǵolııa Ǵylym Akademııasynyń aǵa ǵylymı qyzmetkeri, tarıh ǵylymdarynyń doktory (Sc.D), professor, Qurmethan Muhamadıulynyń kóp jylǵy jınaqtaǵan ǵylymı zertteýlerin arnaıy redaktorlap, tolyqtyrý arqyly oqyrmanǵa usyndyq. Bul kitapqa Aqyt Úlimjiuly týraly zertteýlermen qatar sonaý 1895-1910 jyldary Qazan qalasy baspahanalarynda jaryq kórgen shyǵarmalarynyń túpnusqalary engizilýimen erekshelendi. Ǵylymı negizde saraptanyp, keń kólemde zerttelip jazylǵan ǵylymı izdeniske oqyrman óz baǵasyn beredi dep senemiz» deıdi facebook-tegi jazbasynda Seytkhan Shinarbek esimdi jeli qoldanýshysy.

Aıta ketý kerek, Aqyt Qajy Úlimjiuly - 1866 jyly QHR Shyńjan ólkesi Altaı aımaǵy Kóktoǵaı aýdanynda dúnıege kelgen  qazaq aqyny, dinı qaıratker, halyq aǵartýshysy. Bala kezinen bastap aýyl moldasynan, odan keıin medresede dáris alyp, arab, parsy tilderin jetik meńgergen, sondaı-aq sharıǵat pen tájýıtti úırengen. 1939 jyly Shen Shıtsaı úkimeti tutqynǵa alyp, meshitin talqandap, kitaptary órtelip, 1940 jyly túrmede azaptap óltirilgen.

Aqyt Qajy atamyzdyń 1891 - 1914 jyldary Sankt-Peterbýrg, Qazan baspalarynan «Jıhansha», «Ahıretbaıan», «Sáıpilmúlik - Jamal» dastandary, «Abııat ǵaqıdııa», «Seıitbattal Ǵazy», «Ishan Mahmud» atalatyn kitaptary birneshe ret jaryq kórdi. Onyń shyǵarmalary «A. Altaıskıı» degen búrkenshik atpen «Aıqap» jýrnalyna da jarııalanyp turǵan.