Aqysyz demalysqa jiberilgen qyzylordalyq turǵyndar 42500 teńge aldy

QYZYLORDA. QazAqparat - Tótenshe jaǵdaı saldarynan Qyzylordada birqatar mekemeler óz qyzmetkerlerin aqysyz demalysqa jiberýge májbúr boldy. Olar memleket tarapynan berilgen 42500 teńge áleýmettik tólemge qol jetkizdi, dep habarlaıdy QazAqparat tilshisi.

Qyzylorda qalasyndaǵy «Q-med» klınıkasynda qyzmet jasaıtyn Nurgúl Erǵalıeva óńirde koronavırýs ınfektsııasy saldarynan jarııalanǵan karantın ýaqytynda aqysyz demalysqa jiberildi. Ol áleýmettik tólemge qujattaryn tapsyrǵan bolatyn. Nátıjesinde tıisti qarjyǵa qol jetkizdi.

«Bir aıǵa jýyq ýaqyttan beri úıdemiz. Árıne, tabyssyz qalý ońaıǵa soqqan joq. Memleket basshysynyń tapsyrmasymen júzege asyrylǵan áleýmettik tólem kóp otbasyna qoldaý boldy dep oılaımyn. Men úsh bala tárbıelep otyrmyn. Áleýmettik tólem boıynsha berilgen tıisti qarjyny aldym. Elimiz bul qıyndyqty eńserip shyǵatynyna tolyq senemin», - dedi N. Erǵalıeva.

Atalǵan emhanada qyzmet atqaratyn Svetlana Kolesnıkova da tıisti qarjyǵa qol jetkizgen. Ol memleket tarapynan berilgen áleýmettik tólemge úlken alǵysyn bildirdi.

«Tótenshe jaǵdaı saldarynan jumysta aqysyz demalysqa shyǵýǵa májbúr boldyq. Osy oraıda memleket tarapynan beriletin áleýmettik tólem jaıynda estip, ol boıynsha tıisti qujattardy tapsyrdyq. Oǵan qol jetkizdim. Otbasymda kúıeýim, qyzym men úsheýimiz turamyz. Kúıeýim qarapaıym jumys atqarady. Áleýmettik tólem bizdiń otbasy úshin de úlken qoldaý boldy», - dedi S.Kolesnıkova.