Aqyshev Bank RBK boıynsha júrgizilip jatqan jumystar týraly aıtty
Ulttyq bank basshysynyń aıtýynsha, Bank RBK-nyń máselesin sheshý teńdessiz tetikterdiń bir.
«Іri kredıtorlardyń shyǵyndaryn bólý arqyly Bank RBK qarjylyq júıesin saýyqtyrý - qarjy ınstıtýttardyń qalpyna kelýine yqpal etetin jaýapkershilikti erikti túrde bólisýdiń alǵashqy tájirıbesi. Mundaı iri bankterdiń aktsıonerlerine kapıtaldandyrý boıynsha mindettemelerdiń ulǵaıýy, problemaly qaryz portfelin esepten shyǵarý júkteledi. Osy qaǵıdalar bizdiń zańnamada kórinis tabady dep úmittenemin. Ázirge bul týraly jazylǵan joq», - dedi Almaty ótken VII Qazaqstan qarjygerler kongresinde Danııar Aqyshev.
Ulttyq bank tóraǵasy atap ótkendeı, bank sektoryn saýyqtyrý, Bank RBK-nyń qarjylyq problemasyn sheshý baǵdarlamasy, eń aldymen salymshylardyń múddesin qorǵaýǵa negizdelgen.
«Bul bankte 28 myń shot ashylǵan, onda180 mlrd teńge jatyr. Ókinishke oraı, menedjmenttiń táýekeldi strategııasynyń saldarynan bul aqshalar joǵalýy múmkin. Qazir biz áleýmettik zardaptardy azaıtyp jatyrmyz, Úkimetpen birlesip osyndaı sheshim qabyldaýǵa májbúr boldyq», - dedi Danııar Aqyshev.
Bolashaqta osyndaı jaǵdaıdyń qaıtalanbaýy úshin Ulttyq bank ekinshi deńgeıli bankterdi baqylaýdy kúsheıtýde.
«Bizdiń mindetimiz - azamattardyń sapaly qarjylyq qyzmetter alýyn, olardyń salǵan qarjylary úshin alańdamaýyn qamtamasyz etý, al salyq tóleýshiler qarjy sektorynyń qateligi úshin aqsha tólemeýleri tıis», - dep atap ótti Danııar Aqyshev.
Sondaı-aq, Ulttyq bank basshysy qarjylyq máselelerdi qalpyna keltirý baǵdarlamalaryna qatysyp jatqan 4 iri banktiń bar ekendigin, alaıda ol olardyń jaǵdaılarynyń tómendigin bildirmeıtindigin alǵa tartty.
«Banktiń bólip jatqan resýrstary naqty aqsha emes, ol banktiń kapıtalynda esepke alynatyn quraldar. Qalpyna keltirý baǵdarlamasy aıasynda qarjy alǵan 4 bank problemalyq bankter qataryna jatpaıdy. Olardyń qarjylyq jaǵdaıy birqalypty, problemalyq qaryzdarynyń deńgeıi tómen, atap aıtqanda 25%-dan aspaıdy. Banktiń baǵdarlamaǵa qatysýy - onyń qarjylyq turaqtylyǵynyń joǵary ekendigin bildiredi», - dep qorytyndylady Danııar Aqyshev.
Buryn habarlanǵandaı, Ulttyq Bank QR Úkimetimen jáne áleýetti ınvestorlarmen birlesip kelissózder júrgizip, sonyń nátıjesinde Bankti saýyqtyrý sharalarynyń kesheni ázirlengen edi. Qalypqa keltirý modeline ınvestorlardyń esebinen 160 mlrd teńge somasyndaǵy qarajat bólingen.