Aqyn Saǵynǵalı Seıitovtiń 100 jyldyǵyna arnalǵan sharalar bastaldy
Aldymen aqynnyń týǵan jeri Aqjaıyq aýdanynyń ortalyǵy Chapaev aýylynda «Jyr ǵumyrdyń samǵaýy» atty shara ótkizilip, onda QR Ulttyq kitaphanasy bastaǵan rýhanı ortalyqtarmen tikeleı baılanys jasaldy. Birinshi bolyp J.Moldaǵalıev atyndaǵy oblystyq ǵylymı-ámbebap kitaphanasy habarlasyp, Qazaqstan Jazýshylar odaǵynyń músheleri, aqyn Aıtqalı Nárikov, jazýshy, «Jaıyq úni» gazetiniń bas redaktory Mıra Shúıinshálıeva, aqyn-ustaz Úzildik Eleýbaeva Saǵynǵalı Seıitov týraly óz oı-tolǵamdarymen, estelikterimen bólisti.
Aqjaıyq aýdany ákiminiń orynbasary Tilek Ǵabdýshevtiń aıtýynsha, bıyl aqynnyń 100 jyldyǵyna oraı kóptegen sharalar qolǵa alynýda. Kitap kórmeleri, jyr keshteri óz aldyna, aýdan ortalyǵynda músinge qosa kóshege, týǵan aýyly - Jubandaǵy orta mektepke esimin berý, osy bilim ordasynda S.Seıitov synybyn ashý, aýdandyq tarıhı-ólketaný murajaıynda aqyn-ǵalymǵa qatysty jádigerlerdi jınaqtaý, birneshe aýylǵa saıahat, velojoryq uıymdastyrý oılastyrylýda.
Almaty qalasyndaǵy Ulttyq kitaphanadan tikeleı baılanysqa shyqqan Dıdar Saǵynǵalıqyzy ákesiniń mol murasyn kóziniń qarashyǵyndaı saqtap otyrǵanyn jetkizip, ony qurmettep, eske alyp jatqan Aq Jaıyq jurtshylyǵyna rızashylyǵyn bildirdi.
Buǵan deıin Aqjaıyq aýdany ákimdigi men BQO mádenıet, muraǵattar jáne qujattama basqarmasynyń qoldaýymen «Sulý sózdiń sardary» atty aımaqtyq baıqaý jarııalanǵan bolatyn. Osyǵan oraı S.Báıishev atyndaǵy Aqtóbe oblystyq kitaphanasynan baılanysqa shyqqandar osy sóz saıysyna qatysýǵa yqylasty ekendikterin jetkizdi. Bul baıqaý «Óleń bop aqyn órilse...» (aqynǵa arnap jazylǵan óleńder), «Aq jaýyn jyry tógilse...» (aqyn óleńderin mánerlep oqý), «Talanty taý bop kórinse...» (aqynnyń ómiri men shyǵarmashylyǵyn nasıhattaýǵa arnalǵan ádistemelik-bıblıografııalyq, ınnovatsııalyq quraldar baıqaýy) atty bólimderden turady. Bul sharaǵa jumystar osy jyldyń 10 sáýirine deıin qabyldanady.
«Aqyn Saǵynǵalı Seıitovtiń 100 jyldyǵyna arnalǵan respýblıkalyq, oblystyq deńgeıdegi sharalar jyl boıy ótetin bolady», - dedi «QazAqparat» tilshisine oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynov.