Aqyn Abaı murasyn dáripteý Germanııada jalǵasty

BERLIN. QazAqparat - Uly aqyn Abaıdyń 175 jyldyǵyna oraı Berlındegi Ulttyq kitaphanada «Abaı oqýlary» is-sharasy jáne zııaly qaýym ókildermen kezdesý ótti, dep habarlaıdy QazAqparat QR Ulttyq kitaphanasy baspasóz qyzmetine silteme jasap. ⠀

Atalmysh is-sharaǵa Qazaqstan Respýblıkasynyń Germanııadaǵy Tótenshe jáne Ókiletti elshisi Dáýren Karıpov, Qazaqstan Jazýshylar odaǵynyń tóraǵasy Ulyqbek Esdáýlet, M.Áýezov atyndaǵy Ádebıet jáne óner ınstıtýtynyń dırektory Matyjanov Kenjehan, QR Ulttyq kitaphanasynyń dırektory Baqytjamal Ospanova, QR Ulttyq akademııalyq kitaphanasynyń dırektory Úmithan Muńalbaeva, oblystyq kitaphana basshylary, zııaly qaýym ókilderi men qoǵam qaıratkerleri, qazaq dıasporalary jáne stýdent jastar qatysty.
Sharada Úmithan Muńalbaeva adamzat rýhanııatyna úlesin qosqan Abaıdy ulyqtaý jumystary jalǵasyn tabýda ekenin jetkizdi.

«Abaı oqýlaryn» biz búgin Germanııa memleketinde ótkizýdemiz. Ǵulama ǵalymnyń naǵyz gýmanıstik kózqarasyn, tatýlyqqa, yntymaqqa, baýyrmaldylyqqa bastaıtyn tereń bolmysyn barsha álemge pash etý bizdiń mindetimiz. Adamzattyń Abaıyna aınalǵan aqynnyń ǵalamdaǵy tuǵyry barǵan saıyn bıiktep, máńgi jasaı bereri sózsiz», - dedi Ulttyq akademııalyq kitaphanasynyń dırektory.