Aqyly jolmen júrý tarıfi ózgere me

NUR-SULTAN. QazAqparat – Qazaqstanda aqyly jolmen júrý tarıfi ózgertilmeıdi. Bul týraly QR Indýstrııa jáne ınfraqurylymdyq damý vıtse-mınıstri Berik Kamalıev aıtty, dep habarlaıdy QazAqparat tilshisi.

«Aqyly jolmen júrý tarıfi 2013 jyly bekitilgen. Sodan beri ózgergen joq jáne ózgermeıdi de», - dedi Berik Kamalıev Ortalyq kommýnıkatsııalar qyzmetindegi baspasóz máslıhaty barysynda.

Onyń dereginshe, elimizde jeńil avtokólikter úshin 1 shaqyrymyna 1 teńgeni, aýyr júk kólikteri úshin 1 shaqyrymyna júk syıymdylyǵyna baılanysty 5 teńgeden 25 teńgege deıingi somany quraıdy. Al kórshiles Reseıde jeńil avtokólikter 1 shaqyrym úshin 7 teńge jáne júk kólikteri 7-den 55 teńgege deıin tóleıdi. Eýropa elderindegi tarıfter júk kólikteri úshin 5 ese, al jeńil avtokólikter úshin 20 ese joǵary.