Aqyly joldyń qunyn aldyn ala tólegenderge 50% jeńildik bar – QazAvtoJol
«Biz qazir Jibek joly aqy tóleý beketinde turmyz. Avtojol 8 jolaqtan turady. Bekette 3 operator jolaýshylardyń aqy tóleý protsesi men qaýipsizdigin qadaǵalaıdy. Qajet jaǵdaıda jolaýshylarǵa aqyly jolǵa qatysty protsesterdi túsindiremiz, saýaldaryna jaýap beremiz. Bizdiń basty maqsat – avtokólikterdiń kedergisiz júrýin qamtamasyz etý jáne jolaýshylarǵa konsýltatsııa berý. Bizde aqyly joldar boıynda bekettiń 2 túri bar. Biri operator arqyly qadaǵalansa, ekinshi túrinde onlaın baqylaıdy, beketten shlagbaým arqyly ótedi», - dedi Eldos Mákenov «QazAvtoJol» ulttyq kompanııasy uıymdyrǵan baspasóz týrynda.
Onyń aıtýynsha, jol aqysyn aldyn ala tóleýge nemese sol jerde qolma qol tóleýge de bolady.
«Aqyly joldyń qunyn túrli mobıldi qosymshalardyń kómegimen tóleýge bolady. Odan bólek, bir jyldyq abonoment satyp alý múmkindigi de bar. Tarıfke kelsek, ár jol ýchaskeniń baǵasy ártúrli. Qazir biz «Nur-Sultan – Temirtaý» baǵytyndaǵy tasjolda turmyz. Sonymen qatar tólem kóliktiń túrine 3-ke bólinedi. Ol aýyr júk kóligi, gazel jáne jeńil avtokólikter. Tıisinshe baǵalary da ártúrli. Jalpy sany 7 tarıf túri bar. Baǵaǵa kelsek, jeńil avtomobıl úshin eger jolaýshy aqyly jol aýmaǵyna jetpeı turyp, aldyn ala tólese 200 teńge, al beketke kelip, sol jerde tólese, onda 400 teńge. Demek aldyn ala tóleseńiz 50 paıyz jeńildik qarastyrylǵan. Bul jolaýshylar úshin tıimdi dep oılaımyn», - deıdi ol.
Atalǵan beketke táýlik boıy 3 operator, 1 kassır jáne 1 elektrık jumys istep, aqyly joldyń qyzmetin qamtamasyz etedi.
«Qystygúni jumys kúnderi táýligine 3 myńnan 4 myńǵa deıin, al demalys kúnderi 5 myńnyń shamasynda kólik júredi. Eger kólik júrgizýshisi beketten aqy tólemeı ótip ketse, ol jaǵdaı beınebaqylaý arqyly esepke alynady. Sodan soń kólik ıesine aqy tóleý kerektigi týraly habarlama jiberiledi», - deıdi operator.