Aqyly joldarmen júrý jáne tólem jasaý tártipteri ózgeredi

ASTANA. QazAqparat – «Jalpyǵa ortaq paıdalanylatyn respýblıkalyq mańyzy bar aqyly avtomobıl jolymen júrip ótý úshin aqy alý qaǵıdalaryn bekitý týraly» Indýstrııa mınıstriniń buıryǵyna ózgerister engiziledi, dep habarlaıdy QazAqparat tilshisi.

Buıryqqa saı, endi júrgizýshiler jol aqysyn myna tásildermen tóleıdi:

- tólem júıeleri servısteriniń kómegimen aldyn ala tóleý;

- múmkindik bolǵan ýaqytta qolma-qol tóleý;

- aqyly ýchaskeden shyqqannan keıin kúntizbelik 7 kún ishinde keıingi tólem.

«Paıdalanýshy jol aqysyn kúntizbelik 7 kún ishinde tólemegen jaǵdaıda, jeke tulǵalarǵa 5 aılyq eseptik kórsetkish kóleminde (17 250 teńge) jáne uıymdar úshin 10 AEK (34 500 teńge) aıyppul salý kózdelgen», - dep túsindirme berilgen ózgeriske.

Sonymen qatar, aqyly joldyń ákimshisi ýchaskelerge kirer aldynda tıisti habarlamasy bar aqparattyq tablo ornalastyrady.

Aqparattyq taqtada kelesi aqparat kórsetiledi:

- aqyly ýchaske boıynsha jol júrý aqysynyń quny;

- ýchaskeniń uzyndyǵy;

- jol aqysyn tóleýdiń yqtımal tásilderi;

- aqyly joldyń ákimshisiniń baılanys derekteri.

Bul rette, aqyly joldyń ákimshisine pýnktilerde keptelisti boldyrmaý úshin shlagbaýmdardy dereý kóterý, kóliktiń tıisti jyldamdyǵyn saqtaýdy qamtamasyz etý mindetteledi. Aqyly ýchaskeler boıynsha bereshegi bar júrgizýshiler jolǵa jiberilmeıdi.

Jańa talaptar 16 naýryzǵa deıin kópshilik talqylaýda bolady.