Aqyly joldardy paıdalanýda jeńildikter kólemi keńeıtilmek

NUR-SULTAN. QazAqparat - Byltyr QR Indýstrııa jáne ınfraqurylymdyq damý mınıstrligi aqyly jol ýchaskelerinde jeńildikpen júrýge túzetýler engizýdi kózdeıtin zań jobasyna bastamashy boldy. Qujat jeńildik berilgen adamdar tizimin ulǵaıtýdy qarastyryp otyr, dep habarlaıdy QazAqparat.

«Osylaısha, respýblıkalyq mańyzy bar joldardaǵy aqyly ýchaskelermen jeńildikpen júretinderdiń qataryna soǵys ardagerleri men olarǵa teńestirilgen tulǵalardy qosý kózdelýde. Qazir zań jobasy QR Parlamenti Májilisinde qarastyrylyp jatyr», - delingen mınıstrlik málimetinde.

Búginde aqyly jolǵa irgeles eldi mekenderde turatyn paıdalanýshylardyń bir aýdannyń shegine ótý úshin 1000 teńgeni quraıtyn jyldyq tarıfti qoldanýǵa múmkindigi bar.

Jolaýshylardy turaqty tasymaldaýdy júzege asyratyn avtobýstar, aqyly jolǵa irgeles aýdandardaǵy avtobýstar, jedel medıtsınalyq kómek qyzmetteri, órt sóndirý jáne tótenshe jaǵdaılar qyzmetteri, patrýldik polıtsııa men áskerı tehnıkalar tarıfterden bosatylǵan.

Esterińizge sala keteıik, bıyl uzyndyǵy 5,8 myń shaqyrym joldy aqyly etý boıynsha jumystar júrgizilip jatyr. Bul kelesideı jol ýchaskeleri: «Shymkent – Ózbekstan shekarasy», «Oral – RF shekarasy (Saratov)», «Oral – RF shekarasy (Samara)», «RF shekarasy (Orenbýrg) – Aqtóbe», «Şýchınsk – Petropavl», «Qostanaı – RF shekarasy (Troıtsk)», «Shymkent – Qyzylorda», «Shymkent – Taraz», «Taraz – Qaınar», «Qapshaǵaı – Taldyqorǵan», «Atyraý – Beıneý – Ózbekstan shekarasy», «Qarabutaq – Qyzylorda», «Aqtóbe – Oral», «Aqtaý – Beıneý», «Nur-Sultan – Qostanaı», «Pavlodar – RF shekarasy (Omby)», «Nur-Sultan – Pavlodar», «Pavlodar – Semeı – Qalbataý».