Aqyly joldardan 40 mıllıard teńge jınalady - Roman Sklıar
Mınıstrdiń aıtýynsha, avtomobıl joldaryn kútip ustaý jáne saqtaý maqsatynda aqy alý júıesi engizilip keledi. Bıyl qańtar aıynyń sońynda jalpy uzaqtyǵy 471 shaqyrym bolatyn Almaty-Qorǵas (295km), Almaty-Qapshaǵaı (42km) jáne Astana-Temirtaý (134km) jol ýchaskelerinde aqy alý júıesi tolyq iske qosyldy. Osy jyldyń sońynda barlyq aqyly joldardan túsetin jyl saıynǵy qarjynyń kólemi shamamen 5 mıllıard 400 mıllıon teńgeni quraıtyn bolady.
«Kelesi jyly aqy alý júıesin taǵy 5 myń 500 shaqyrymǵa júrgizý josparlanýda, ol avtomobıl joldaryn kútip ustaý shyǵyndaryn azaıtýǵa múmkindik beredi. 2022-shi jyldyń sońyna qaraı uzaqtyǵy shamamen 6 myń 500 shaqyrym jol aqyly bolady. Al odan túsetin qarjy 40 mıllıard teńgege jetedi degen boljam bar. Atalǵan qarjy joldyń ózin-ózi kútip ustaý rejımine ótýge múmkindik beredi», - dedi R.Sklıar Úkimettiń búgingi otyrysynda.
Aıta keteıik, otyrysta «Nurly jol» memlekettik baǵdarlamasyn iske asyrý barysy qaraldy. Bıyl 4 400 shaqyrym joldy salý jáne qaıta jańǵyrtý jumystary josparlanǵan.
«Qaraǵandydan Almatyǵa deıin jáne Aqtóbeden Reseı Federatsııasynyń shekarasyna (Astrahanǵa) deıin qurylys jumystary bastalady. Jyl sońynda qaıta jańǵyrtylǵan 654 shaqyrym avtojol qozǵalysyn ashý josparlanýda. Astana-Pavlodar (441 km), Şýchınsk-Zerendi (80 km), Beıneý-Aqjigit (85 km), Taskesken-Baqty (20 km), Jetibaı-Jańaózen (73 km) jobalary boıynsha jumystar tolyǵymen aıaqtalady», - deıdi R.Sklıar.