Aqyly joldar: Jyl basynan beri 30-dan astam qoǵamdyq talqylaý ótti

NUR-SULTAN. QazAqparat - Qazaqstan óńirlerinde respýblıkalyq mańyzy bar joldarǵa aqyly júıe engizý boıynsha qoǵamdyq tyńdaýlar ótkizý jalǵasýda. «QazAvtoJol» ulttyq kompanııasy men jergilikti atqarýshy organdardyń ókilderi jáne qoǵam belsendileri birlesip, atalǵan máseleni jiti talqylaýda, dep habarlaıdy QazAqparat QR IIDM baspasóz qyzmetine silteme jasap.

2021 jyldyń qańtarynan bastap Jambyl, Almaty, Qyzylorda, Atyraý, Mańǵystaý jáne Túrkistan oblystarynda avtomobıl joldarynyń 7 ýchaskesi boıynsha 35 eldi mekende qoǵamdyq tyńdaý ótkizilgen. Ulttyq operator ókilderi júıeni engizý kezeńderi, jeńildikter, tarıfter, jáne tólemniń artyqshylyqtary týraly halyqty habardar etti.

Aqyly avtomobıl joldary jelisin keńeıtýdiń uzaq merzimdi álemdik tájirıbesi Qazaqstanda da tıimdiligin dáleldegen. Qazirgi ýaqytta elimizde 4 aqyly ýchaske jumys isteýde: «Nur-Sultan – Şýchınsk», «Nur-Sultan – Temirtaý», «Almaty – Qapshaǵaı» jáne «Almaty – Qorǵas». Bıyl aqyly joldar júıesin 5,8 myń shaqyrym jolǵa engizý kózdelgen.

Jalpy, 2020-2025 jyldarǵa arnalǵan ınfraqurylymdy damytýdyń «Nurly jol» memlekettik baǵdarlamasy arqyly 11 myń shaqyrym avtomobıl jolyn aqyly etý josparlanýda.

Sonymen birge qoǵamdyq tyńdaýlar Aqmola, Pavlodar, Shyǵys Qazaqstan jáne Qostanaı oblystarynda jáne Nur-Sultan qalasynda ótkiziledi.