Aqyly joldar beketinen toqtaýsyz ótý tehnologııasy qarastyrylýda
«2013 jyly borttyq qurylǵy - transponderler paıdalanýǵa engizildi. Eger transponderdi paıdalaný kezinde qurylǵy úshin kepildik qunyn (3 971 teńge) tóleý jáne qosymsha tehnıkalyq qyzmet kórsetý qajet bolsa, al qazirgi kezde kólik quralynyń memlekettik nómirine arnalǵan teńgerimdi toltyrý tehnologııasy jumys istep tur. Bul tásil jol aqysyn tóleýdiń eń yńǵaıly jáne tıimdi tásili bolyp tabylady. Búginde teńgerimdi eldi mekenderde, janar-jaǵarmaı quıý stantsııalarynda jáne t.b. toltyrýǵa bolady. Aldaǵy ýaqyttarda kólik quralyn eń joǵary sáıkestendirýdi jáne aqy alý beketi arqyly toqtaýsyz ótýdi qamtamasyz etýdi júzege asyratyn, passıvti RFID belgileri ınnovatsııalyq tehnologııasyn engizý qarastyrylýda»,-dep atap ótilgen kompanııa málimetinde.
Astana-Şýche aqyly jol bóliginde qozǵalys jolaqtarynyń ótkizý qabiletin arttyrý jáne jol keptelisin boldyrmaý úshin 2015 jyldyń kúzinen bastap aldyn ala tólem negizinde jumys isteıtin jolaq iske qosylǵan. Bul jolaqtyń mánisi - árbir qoldanýshy aqyly bólikke shyǵardan buryn qalanyń, sondaı-aq, memleketimizdiń kez kelgen núktesinen QiWi, Kassa 24 tólem júıeleri arqyly aldyn ala tólem jasaý múmkindiginde bolyp tabylady, bul aqyly beket arqyly ótý ýaqytyn aıtarlyqtaı qysqartady.
«Sondaı-aq, «KaspiBank» AQ, «Teńge» jáne Kıberplat tólem júıeleriniń kómegimen termınaldar sany kóbeıtiletin bolady. Qoldanýshy aldyn ala tólem jasamaǵan jaǵdaı úshin Dırektsııa «Mobıldi kassır» servısin qarastyrǵan. Bul servıstiń kómegimen qoldanýshy kólik quralynyń (KQ) shotyn AAP-ǵa (aqy alý pýnkti) kirgen kezde toltyra alady»,-deıdi kompanııa ókilderi.
Statıstıkaǵa qarasaq, 2015 jyldyń jaz maýsymynda jol aqysy úshin aldyn ala tólem jasaǵan KQ sany 263 bolsa, 2016 jyly 2105 avtokólikti quraǵan.
«Atalǵan málimetti taldaı otyryp, aldyn ala tólem boıynsha júretin qoldanýshylardyń kópshiligin turaqty qoldanýshylar (KQ-nyń jalpy aǵynynyń 20%-ǵa jýyǵyn) quraıdy. Qalǵan bóligin aqyly bólikke birli-jarym shyǵatyndar quraıdy, sondyqtan da olar aldyn ala tólem jasaýdy qajet dep sanamaıtyn shyǵar. «QazAvtoJol» UQ» AQ aqparattyq búktemeler men flaıerler taratý boıynsha is-sharalar ótkizip turady, saıtqa, áleýmettik jelilerge jáne BAQ-qa aqparat ornalastyrady. Aqyly joldardyń artýymen aldyn ala tólemdi qoldanýshylar sany da arta túsedi dep joramaldaımyz»,-delingen kompanııa málimetinde.