Aqyly túrde oqıtyn stýdentter jataqhanada tura ala ma – Mınıstrlik jaýaby

ASTANA. QazAqparat – QR Ǵylym jáne joǵary bilim mınıstrligi Joǵary jáne joǵary oqý ornynan keıingi bilim komıteti tóraǵasynyń orynbasary Aqerke Abylaıhan aqyly túrde oqıtyn stýdentterdiń jataqhanadan oryn alýǵa tolyq quqyly ekenin, zańnamalyq esh shekteý joǵyn aıtty, dep habarlaıdy QazAqparat tilshisi.

«Zańdy turǵyda esh shekteý qoıylmaǵan. Osy jyldan bastap stýdenttiń grantta nemese aqyly oqıtynyna qaramastan ýnıversıtetterdiń jaýapkershiligi qarastyrylǵan zań kúshine enedi. Barlyq stýdent jataqhanalardan oryn alýǵa quqyly», - dep túsindirdi Aqerke Abylaıhan Ortalyq kommýnıkatsııalar qyzmetinde ótken brıfıngte.

Sonymen birge spıker jataqhanalardaǵy oryndardy bólý kezinde eń aldymen, halyqtyń áleýmettik osal toptarynyń stýdentteri, sodan keıin birinshi kýrs stýdentteri ornalastyrylatynyn atap ótti.

«Jataqhanalarda oryn tapshylyǵy bar ekenin bárimiz kórip otyrmyz. Eger stýdent osy toptarda bolsa, oryn bólý kezinde basymdyqqa ıe bolady. Jalpy, zań júzinde eshqandaı shekteýler joq: stýdent aqyly negizde de, grantta da jataqhanaǵa ornalasa alady», - dep tolyqtyrdy komıtet basshysynyń orynbasary Aqerke Abylaıhan.