Aqyly olımpıadalardyń Bilim jáne ǵylym mınıstrligine qatysy joq - Sholpan Karınova
«Qoǵamda kóp talqylanyp júrgen máselege toqtalyp ótpekpin. Bul óz kezeginde uıymdastyrylyp jatqan aqyly olımpıadalar men konkýrstarǵa qatysty. Qazirgi kezde qazaqstandyq bilim berý naryǵynda jekemenshik kásiporyndar men uıymdar da osy qyzmetterdi usynyp keledi. Olar túrli aqparat kózderi arqyly ata-analarǵa da, oqýshylarǵa da, muǵalimderge de, mektepterge de málimetterdi tolyqtaı jetkizip turady. Bul qyzmet kórsetý salasy lıtsenzııalanbaıdy jáne mınıstrlik tarapynan resmı turǵyda ruqsat alýdy qarastyrmaıtyn qyzmet túri. Qazirgi kezdegi tájirıbede osy konkýstardyń barlyǵy aqyly túrde ótkizilip jatyr. Olarǵa qatysý úshin ata-analar óz qarajatyn salady», - dedi Sh. Karınova Ortalyq kommýnıkatsııalar qyzmetinde.
Osy oraıda ol atalǵan aqyly jarystardyń deńgeıi túrli dárejede ekenin atap ótti.
«Ata-analar men muǵalimderdiń atap ótýinshe, olardyń ishinde óte nashar uıymdastyrylatyndary da kezdesedi. Sonymen qatar, balalardyń damýy turǵysynan qyzyqty ári tanymdyq túrde ótkiziletin olımpıadalar barshylyq. Kóbinese bul uıymdar olımpıadalar ataýyn mınıstrliktiń tizbesinde bekitilgen jarystar sekildi etip jarııalaıdy. Biraq Bilim jáne ǵylym mınıstrliginiń bul aqyly jarystarǵa eshqandaı qatysy joq ekenin atap ótemin. Sondyqtan balalar men muǵalimder, mektepter ártúrli olımpıadalar men konkýrstarǵa oqýshylardyń qatysýyn tańdaǵan kezde muqııat bolýyna keńes beremiz», - dedi vıtse-mınıstr.
Onyń aıtýynsha, óz qarajatyn jumsamas buryn, ata-analar uıymdastyrýshynyń kim ekenin, balalardy damytýda qandaı tájirıbesi bar ekenin, balalardyń olarǵa ne úshin qatysýy kerektigin, olardyń qandaı daǵdylardy damytatynyn anyqtaý alýy mańyzdy.
Budan buryn habarlanǵandaı, Bilim jáne ǵylym mınıstrligi uıymdastyratyn olımpıadalar oqýshylar úshin aqysyz negizde bolady.