Aqylbek Kúrishbaevtyń depýtattyq ókilettigi toqtatyldy
Senat tóraǵasy Máýlen Áshimbaevtyń aıtýynsha, A. Kúrishbaev basqa jumysqa aýysýyna baılanysty depýtattyq ókilettigin toqtatý jóninde ózi ótinish jasaǵan. Ortalyq saılaý komıssııasy bul ótinishti qarap, Senatqa tıisti usynym engizdi.
«QR Parlamenti Senatynyń depýtaty Aqylbek Qajyǵululy Kúrishbaev mindetterin atqarýdy óz erkimen bosatý týraly ótinish berdi. Osyǵan oraı Qazaqstannyń Ortalyq saılaý komıssııasy sizderdiń nazarlaryńyzǵa QR Konstıtýtsııasynyń 52-babyna QR Parlamenti jáne onyń depýtattarynyń mártebesi týraly QR Konstıtýtsııalyq zańynyń 24-baby 3 jáne 8-tarmaqtaryna sáıkes Senat depýtaty Aqylbek Kúrishbaevtyń ótinish berýine baılanysty onyń ókilettigin merziminen buryn toqtatý týraly máseleni sheshý úshin usynym engizdi», - dedi QR Ortalyq saılaý komıssııasynyń múshesi Shavkat Ótemisov.
Depýtattar atalǵan qaýlyny qabyldady.
«Aqylbek Qajyǵululy Senattyń zań shyǵarý jumysyna óziniń súbeli úlesin qosty. Depýtattyq saýaldar arqyly halyqty alańdatqan mańyzdy máselelerdi oń sheshýge de belsendi atsalysty. Hatshy retinde komıtet jumysyn tıimdi uıymdastyrýǵa da zor eńbek sińirdi. Osy atqarǵan barlyq jumystar úshin Aqylbek Qajyǵululyna Senat basshylyǵy atynan rızashylyǵymyzdy bildirip, alǵysymyzdy aıtamyz. Depýtat retinde atqarǵan qyzmetin joǵary baǵalaı otyryp, Palata bıýrosy Aqylbek Qajyǵululyn Senattyń Qurmet gramotasymen marapattady. Qurmet gramotasyn tapsyrýǵa ruqsat etińizder. Jańa qyzmetińizge tabys pen sáttilik tileımiz», - dedi M. Áshimbaev.
Aıta keteıik, Aqylbek Kúrishbaev elimizde jańadan ashylatyn zamanaýı ǵylymı zertteý ınstıtýtyn basqarady.