Aqylbek Kúrishbaev memorgandardyń azyq-túlik ınflıatsııasyna qarsy jumysyn synǵa aldy
Premer-Mınıstr Álıhan Smaıylovqa joldaǵan depýtattyq saýalynda senator azyq-túlik ınflıatsııasynyń rekordtyq deńgeıge jetkeni týraly másele kóterdi.
Óz sózinde depýtat Qazaqstan aýylsharýashylyq ónimderiniń negizgi túrlerin eksporttaıtyn álemdegi 10 eldiń qataryna kiretinine qaramastan azyq-túlik baǵasynyń ósýi mańyzdy máselege aınalǵanyn atap ótti jáne bizdiń elimiz azyq-túlik ınflıatsııasynyń deńgeıi boıynsha kóptegen elderdiń aldyna túsip ketkenine nazar aýdardy.
«Qazirgi ýaqytta bizdiń memlekettik organdarymyz órt sóndirý ádisimen jumys isteıdi dep aıtýǵa bolady, olardyń is-qımyly aldyn alý sıpatyndaǵy sharalardy qoldanýǵa emes, aıaqasty týyndaǵan jaǵdaıǵa jaýap qaıtarýǵa ǵana baǵyttalǵan. Aýyl sharýashylyǵy taýarlaryn eksporttaýǵa tyıym salý jáne eksporttyq kvotalardy engizý ońaı. Biraq ondaı shekteýler fermerlerdi bankrottyqqa, al otandyq agroónerkásip kesheniniń damýyn tejelýine ákep soǵady. Eń soraqysy, bizde eldiń azyq-túlik qaýipsizdigin qamtamasyz etý máselelerinde júıelilik joq», - dedi Aqylbek Kúrishbaev.
Onyń aıtýynsha, keıbir ónim túrleri boıynsha óndiris kólemi tutynýdyń fızıologııalyq normalarynyń negizinde eseptelgen ishki naryqtyń qajettiliginen asyp ketedi. Al shyn máninde bul ónimder boıynsha Qazaqstan áli de ımportqa táýeldi bolyp otyr. Basqasha aıtqanda, halyqtyń azyq túlikti tutyný normalaryn anyqtaýda shynaıy obektıvti tásiline aýysý kerek.
«Bizde azyq-túlik qaýipsizdigi doktrınasy qabyldanyp, onyń naqty kórsetkishteri, baǵalaý ólshemsharttary men qamtamasyz etý tetikteri aıqyndalýy tıis. Barlyq damyǵan elderde bul máseleler uzaq merzimdi ekonomıkalyq baılanysty qalyptastyra otyryp, belgilengen baǵamen forvardtyq jáne fıýcherstik kelisimsharttardy damytý arqyly sheshiledi. Sondyqtan olarda azyq-túlik taýarlaryn ishki naryqqa belgilengen baǵalar boıynsha jetkizýdiń turaqty kólemi saqtalyp otyrady. Osy sebepten atalǵan elderde azyq-túlik ınflıatsııasy bizdegideı kóterilmeıdi», - dedi senator.
Ashyǵyn aıtý kerek, qazirgi ýaqytta aýyl sharýashylyǵy taýarlaryn óndirýshiler sýbsıdııa ala otyryp, ishki azyq-túlik naryǵynyń jaı-kúıine, azyq-túlik baǵasynyń qymbattaýyna qatysty eshqandaı jaýapkershilik almaıdy.
«Naqtyraq aıtsaq, kóptegen baǵyttar boıynsha sýbsıdııalaý júıesi bıýdjet qarajatyn jaı ǵana taratý rásimine aınaldy. Ósirilgen ónimdi ishki azyq-túlik naryǵyna forvardtyq kelisimsharttar boıynsha jáne belgilengen baǵalarǵa sáıkes jetkizýdi sýbsıdııa alýdyń mindetti sharty retinde engizý qajet. Osy tetikti ázirleıtin bolsaq, forvardtyq kelisimsharttarǵa avans berý esebinen aýyldaǵy taýar óndirýshilerdiń aınalym qarajatyn tolyqtyrý, ıaǵnı nesıelendirý máseleleri de bir mezgilde sheshiledi. Atalǵan júıeli ózgeristerdi iske asyrý úshin qoldanystaǵy zańnamaǵa ózgerister men tolyqtyrýlar engizý qajet», - dedi A. Kúrishbaev.