Aqylbek Kúrishbaev ıgerilmeı jatqan jer máselesin kóterdi

NUR-SULTAN. QazAqparat – Búgin Parlament Senatynyń jalpy otyrysynda depýtat Aqylbek Kúrishbaev ıgerilmeı jatqan jerlerge qatysty Úkimet basshysy Asqar Mamınniń atyna depýtattyq saýal joldady, dep habarlaıdy QazAqparat tilshisi.

«Aýyldyq jerlerdi órkendetýdiń negizi – jeke qosalqy sharýashylyqtardy damytýdyń naqty mehanızmin qalyptastyrý. Ol úshin ǵaryshtyq monıtorıng derekteri negizinde, ıgerilmeı nemese tıimsiz paıdalanyp jatqan jerlerdi qaıtyp alý jónindegi jumystatrdy belsendi túrde júrgizý kerek. Sondaı-aq, olardy eń aldymen jeke qojalyq sharýalarynyń jer máselelerin sheshý úshin paıdalaný qajet», – dedi Aqylbek Kúrishbaev.

Sonymen qatar senator aýyl sharýashylyǵynyń ınfraqurylymyn damytýdyń tıimdi tetikterin usyndy. Depýtat óz saýalynda: Ákimshilik jáne aımaqtyq áleýmettik kásipkerlik korporatsııalary arqyly bıýdjettik jáne nesıelik qarjy esebinen qajetti óndiristik ınfraqurylymdardy salyp, olardy kooperatıvterge lızıngke berý nemese bólip tóleý arqyly satý máselesin kóterdi. Bul jumysqa seriktes retinde sharýashylyqtardy jumyldyrý qajettiligin de atap ótti.

«Olar qolda bar óndiristik ınfraqurylymdardy paıdalaný arqyly jańa qurylǵan kooperatıvterdiń qalyptasýyn jedeldetýge qol jetkizedi», – deıdi depýtat.