Aqylbek Kúrishbaev agrarlyq ǵylymdy tejep turǵan problemalardy atady
«Agrarlyq ǵylymnyń tıimdiligin tejeıtin, óz qolymyzben jasap otyrǵan sebepterdiń biri – agrarlyq ǵylymı jobalar men baǵdarlamalardy iske asyrý merziminiń shekteýligi. Bizde ǵylymı konkýrstardyń talaby boıynsha oǵan 3-aq jyl beriledi. Bulaı aýyl sharýashylyǵy ǵylymı zertteýlerdiń ýaqytyn shekteýge bolmaıdy. Sebebi atalǵan saladaǵy zertteýler bıýdjettik josparlaý merzimine emes, aýa-raıynyń erekshelikterimen baılanysty», - dedi Aqylbek Kúrishbaev Parlament Senatynyń ǵylym jónindegi zań jobasyn talqylaý kezinde .
Onyń aıtýynsha eshbir elde aýyl sharýashylyǵyndaǵy jańa suryptar, tehnologııalar 3 jyl ishinde jasalmaıdy. Keńes odaǵy kezeńinde ǵylymı zertteýlerge kem degende 5 jyl ýaqyt beriletin.
«Qazir biz ózimizdiń ǵylymı jobalarymyzǵa sheteldik ǵalymdardy tarta almaǵandyqtan, sheteldik tehnologııalardyń transfertin qamtamasyz ete almaı otyrmyz. Sebebi bizdiń seriktesterimiz 3 jyl merzimde aýyl sharýashylyǵynda mańyzdy ǵylymı nátıjelerge qol jetkizýdiń múmkin emestigin túsinedi. Demek, agrarlyq ǵalymdarymyzdy biz ózimiz tyǵyryqqa tirep otyrmyz. Árıne, osydan keıin óndiristiń suranysyn óteı almaıtyn, «shıki» ǵylymı jobalar paıda bolady», - deıdi ol.
Senator jalpy, qazaqstandyq ǵylymnyń qazirgi deńgeıin kórsetetin tómendegi derekterge nazar aýdarýǵa shaqyrdy.
«2020 jylǵy «Jahandyq ınnovatsııalyq ındeks» reıtıngisine sáıkes, Qazaqstan ınnovatsııalyq qyzmet tıimdiligi kórsetkishi boıynsha tek 77-orynǵa ıe boldy. Damyǵan elder týraly aıtpaǵanda, biz Reseı men Belorýssııadan aıtarlyqtaı artta qalyp, Armenııadan, Mońǵolııadan, ıAmaıka jáne Panamadan da tómengi orynǵa tústik. Al ózimizdiń statıstıkalyq derekterimizge súıensek, 2019 jyly bizdegi ınnovatsııalyq ónim kólemi eldiń jalpy ishki óniminiń nebári 1,6%-yn quraǵan, osy kórsetkish boıynsha biz Reseıden 8 ese, damyǵan elderden 20-30 ese artta qalyp otyrmyz. Nege bulaı? Basty sebep – ǵylymdy qarjylandyrýdyń jetkiliksizdigi», - dedi ol.
Senator elimizdiń ǵylymy salasynda «velosıpedti» qaıta oılap tappaı, álemde jınaqtalǵan tájirıbeni qoldana otyryp, ǵylymı zertteýlerdi uıymdastyrýdyń zamanaýı júıesin engizý kerek dep esepteıdi.
«Biz Bilim jáne ǵylym mınıstrligi jumysynyń qanshalyqty kúrdeli jáne kóp qyrly ekenin túsinemiz. Qurmetti Ashat Qanatuly, ózińizdiń basshylyǵyńyzben bilim-ǵylym salasynda biraz oń nátıjeli jumystar júrip jatyr. Sonymen qatar, Sizden ǵylymnyń sapaly ǵylymı áleýetin qalyptastyrýǵa qatysty joǵaryda aıtylǵan basym mindetterge nazar aýdarýyńyzdy suraımyn», - dep túıdi ol.