Aqushtap Baqtygerevanyń 75 jyldyǵy týǵan jerinde bastaý aldy

ORAL. QazAqparat - Aqyn, Memlekettik syılyqtyń ıegeri Aqushtap Baqtygerevanyń 75 jyldyǵyna arnalǵan sharalar týǵan jerinen bastaý aldy, dep habarlaıdy QazAqparat tilshisi.

BQO mádenıet basqarmasynyń basshysy Qadyrbolat Musaǵalıevtiń aıtýynsha, óńirde ádebıetimizdiń biregeı tulǵalarynyń esimderin ulyqtaý, shyǵarmashylyǵyn keńinen nasıhattaý jumystary jyl saıyn jalǵasyp keledi.

Ótken jyly daýylpaz aqyn Taıyr Jarokov pen jazýshy, Memlekettik syılyqtyń ıegeri Hamza Esenjanovtyń 110 jyldyǵy toılansa, bıyl kezek Aq Jaıyqtyń aq shaǵalasy atanǵan Aqushtap Baqtygerevaǵa kelip otyr. Aldaǵy jyly Qazaqstan halyq jazýshysy, KSRO jáne Qazaqstan Memlekettik syılyqtarynyń laýreaty Juban Moldaǵalıevtiń 100 jyldyǵy keń kólemde atalyp ótiletin bolady.

Ótken jyldyń jeltoqsanynda Aqushtap Baqtygereevanyń Elbasynyń qolynan Memlekettik syılyqty alǵany belgili. Bul - Memleket basshysy tarapynan kórsetilip otyrǵan ádebıetke, talantqa jáne elge degen qurmet.

Qadyrbolat Qabdyrulynyń sózine qaraǵanda, Aqushtap aqynǵa arnalǵan sharalar jyl boıy jalǵasady. Sonyń ishinde respýblıkalyq jyr oqýlary ótedi.

Búgin aqynnyń týǵan jeri - Terekti aýdanynda mereıtoılyq shara onlaın túrinde bastaý aldy. Onda aýdan ákimi Ádil Jolamanovtyń málim etkenindeı, bıyl jazba aqyndar arasynda «Ǵalamat jyr týdyrar aqyn beıne» atty respýblıkalyq jyr músháırasy uıymdastyrylmaqshy. Túrli ádebı-mádenı keshter men kitap kórmeleri, tárbıe saǵattary, Aqushtap oqýlary ótip, Aqjaıyq mektebinde aqyn synyby ashylady. Aqyn mereıtoıy qyrkúıek aıynda týǵan jeri - Aqjaıyq aýylynda keń kólemde ótetin respýblıkalyq sharamen qorytyndylanady.

Almatydan tikeleı ekran arqyly habarlasqan QR Ulttyq kitaphanasy dırektorynyń orynbasary Ajar Hamıtqyzy aqynnyń osynaý rýhanııat ortalyǵymen áli kúnge deıin baılanysyn úzbegenin, munda Aqushtap Baqtygereevanyń 1967 jyly jaryq kórgen «Órimtal» atty kitabynan bastap barlyq jınaqtarynyń saqtalyp, oqyrmandar ıgiligine aınalyp otyrǵanyn, mereıtoılyq sharalar Alataý tórinde de uıymdastyrylatynyn jetkizdi.

Aqyn, Qazaqstan Jazýshylar odaǵynyń múshesi Aıtqalı Nárikovtiń baıan etkenindeı, elimizde ótken ǵasyrda Sholpan Imanbaeva, Zııash Qalaýova, Marııam Hakimjanova syndy aqyn qyzdardyń izin alpysynshy jyldary Aqushtap Baqtygereeva jalǵastyryp, ádebı ortaǵa erte tanyldy. Farıza Ońǵarsynova, Kúlásh Ahmetova, Marfýǵa Aıtqojınalarmen birge jyr bıigine kóterildi.

Jıyn barysynda sondaı-aq aqyndar Saǵyntaı Bısenǵalıev, Tiles Jazyqbaı, jazýshy, Qazaqstan Jazýshylar odaǵynyń múshesi Baýyrjan Ǵubaıdýllın Aqushtap aqynnyń shyǵarmashylyǵy týrasynda oı tolǵap, óz pikirlerin bildirdi. Aqyn jyrlary oqyldy.