Aqtútek boran: Qostanaıda qar qursaýynan qutqarylǵan adamdar jylytý pýnktin panalap otyr

<p>Qostanaı oblysynda aýa raıynyń kúrt nasharlaýyna baılanysty jolda qalǵan adamdarǵa jedel kómek kórsetilip jatyr, dep habarlaıdy <a href="https://kaz.inform.kz/" target="_blank" rel="noopener">Kazinform</a>.&nbsp;</p>

Dál qazir Qostanaı oblysynda 257 jylytý pýnkti (13 respýblıkalyq, 11 oblystyq jáne 232 JAO) jumys istep tur. 

Oblystyq TJD málimetinshe, ondaǵy jalpy oryn sany — 11 255.

Bul pýnkter aýa raıynyń nasharlaýyna baılanysty qıyn jaǵdaıǵa tap bolǵan júrgizýshiler men jolaýshylarǵa asa qajet.

Aıta ketsek, Áýlıekól aýdany Áýlıekól aýylynda mektep-ınternat bazasy men DEÝ-55-te jalpy syıymdylyǵy 74 oryndyq pýnkt bar.

Áýlıekól bastaýysh mektebiniń jylytý pýnktine 24 adam ornalastyrylyp, bári azyq-túlikpen qamtamasyz etildi.

Tótenshe jaǵdaılar qyzmetiniń kúshimen qurǵaq azyq úlestirildi.

Aıta keteıik, qutqarýshylar búgin taǵy 9 adamdy qar qursaýynan alyp shyqty.

Foto: Qostanaı oblysy TJD

26 jeltoqsan kúni Qostanaı aýdanynyń Nadejınka kentinen Qostanaı qalasyna bet alǵan qutqarý brıgadasy Tobyl ózeniniń jaǵasynan Priora kóligin baıqaǵan.

Kólikten ári qaraı 2 shaqyrym qashyqtyqta, jol boıynda 4 er adam tabyldy.

Sózine sensek, olar balyq aýlap júrip, borannyń qalaı kúsheıip ketkenin ańdamaı qalǵan. Onyń ústine kóligi buzylǵan (akkýmýlıatorynda aqaý bar). 

Mamandar olardy Trekol kóligimen alyp ketti.

Sondaı-aq Borovskoe-Molodejnoe avtojolynda 3 jeńil kólikten 5 adam evakýatsııalandy. Bári Molodejnoe aýylyna jetkizildi.