Aqtoty Raıymqulova: Joldaý - qordalanǵan máselelerdi sheshýdiń baǵytyn aıqyndaǵan qujat
«Prezıdent Joldaýyn mádenıet salasynyń qyzmetkerleri erekshe yqylaspen qabyldady. Qasym-Jomart Kemelulynyń mádenıet qyzmetkerlerine memleket tarapynan salıqaly qoldaý kórsetý týraly tasyrmasy el rýhanııatynyń jańa deńgeıge kóterilýine tyń serpin bereri anyq.
Memleket basshysy «Biz mádenıet salasynda jumys isteıtin azamattarǵa jetkilikti túrde kóńil bólmeı otyrmyz. Bul - eń aldymen, kitaphana, mýzeı, teatr qyzmetkerlerine qatysty másele. Olardyń eńbekaqysy sońǵy jyldary múlde kóbeıgen joq. Sonyń saldarynan mádenıet qyzmetkerleri, ásirese jas mamandar jeńildigi bar turǵyn úı baǵdarlamalaryna qatysa almaıdy. Mundaı ahýal osy kásiptiń bedelin túsirip, laıyqty kadrlardyń tapshylyǵy aıqyn sezilýde» dep atap kórsetti, dep jazdy Aqtoty Raıymqulova Facebook-tegi paraqshasynda.
«Joldaýda aıtylǵandaı, Prezıdent tapsyrmasymen kelesi jyly Úkimet tarapynan mádenıet qyzmetkerleriniń eńbekaqysyn kóterý kózdelip otyr. Sonymen qatar, mádenıet salasynyń qyzmetkerlerine bilim berý jáne densaýlyq saqtaý salalaryndaǵy áleýmettik jeńildikter berilýi qarastyrylatyn bolady.
Sondaı-aq, Memleket basshysy barlyq jastaǵy azamattardy buqaralyq sportqa tartý arqyly ult densaýlyǵyn nyǵaıtý máselesine de nazar aýdarýdy tapsyrdy. «Sport ınfraqurylymy balalarǵa barynsha qoljetimdi bolýyn qamtamasyz etý qajet. Buqaralyq dene shynyqtyrýdy órkendetý isi jańa chempıondar shyǵatyn pıramıdaǵa aınalýy tıis. Bul salaýatty ári belsendi jastardyń, túptep kelgende, qýatty ulttyń negizin qalyptastyrady. Osy baǵdardy zańnamalyq turǵydan qamtamasyz etý, buqaralyq sportty damytýdyń Keshendi josparyn qabyldaý qajet. 2020 jyl Volonter jyly dep jarııalandy. Eriktiler qyzmetine azamattardyń, ásirese jastardyń, stýdentter men oqýshylardyń qatysý aıasyn keńeıtý, olardyń boıynda belsendi ómirlik ustanym daǵdysyn qalyptastyrý - ózekti mindet. Bul - azamattyq qoǵamdy nyǵaıtý jónindegi jumysymyzdyń mańyzdy quramdas bóligi» dep atap kórsetti Q. Toqaev.
Joldaýda ekonomıkanyń mańyzdy salasy retinde týrızmniń, ásirese eko jáne etnotýrızmniń damýyna basa nazar aýdarý kerek ekenin atap ótti. Týrızmdi damytý úshin qajetti ınfraqurylymdardy júrgizýdi, sonyń ishinde jol salý, bilikti mamandardy daıyndaýdy qamtamasyz etý qajettigi basa aıtyldy.
Kelesi jyly ál-Farabı men Abaı Qunanbaev tárizdi uly tulǵalardyń mereıtoılaryn atap ótý josparlanyp otyr. Oǵan daıyndyq jumystarynyń bastalyp ketkenin bilesizder. Memleket basshysy toılaǵan kezde ysyrapqa jol bermeı, ǵulamalardyń eńbekterin halyqqa keńinen taratýǵa shaqyrdy. Sondaı-aq, Qazaqstan Respýblıkasynyń Táýelsizdiginiń 30 jyldyǵy jaqyndap qaldy. Prezıdent elimizdiń jas urpaǵynyń boıynda patrıotızmdi qalyptastyrýda máni zor merekege laıyqty daıyndalýdyń mańyzy zor ekenin atap ótti.
Memleket basshysy Joldaýda atap ótkenindeı, elimiz reformalaýdyń jańa kezeńine aıaq basty. Aldymyzda qyzyqty jáne jaýapty ister kóp, dostar. Elimizdiń Prezıdenti Joldaýda aıtqan tapsyrmalardy júzege asyryp, sapaly nátıjege jumys isteımiz»,-dep atap ótken Mádenıet jáne sport mınıstri.