Aqtoty Raıymqulova jańa oqý jylynyń bastalýyna oraı keńes ótkizdi
Vedomstvo málimetinshe, keńeste pedagogtar men qyzmetkerlerdiń, sondaı-aq bilim alýshylardyń vaktsınalaý qarqynynyń monıtorıngisi boıynsha esep tyńdaldy. Osyǵan baılanysty bilim berý uıymdarynyń, mádenıet jáne sport mekemeleriniń barlyq basshylaryna sońǵy úsh aı ishinde turaqty medıtsınalyq qarsy kórsetilimi bar jáne COVID-19-ben aýyryp jazylǵan qyzmetkerlerdi qospaǵanda, qyzmetkerler men kámeletke tolǵan stýdentterdi 100 paıyz vaktsınalaýdy qamtamasyz etý tapsyryldy.
Sondaı-aq Aqtoty Raıymqulova joǵary bilikti mamandardy daıarlaýdyń mańyzdy máselesi – bilim berý mekemeleriniń materıaldyq-tehnıkalyq bazasy ekenin aıtty. Búgingi tańda mınıstrliktiń qaraýyndaǵy barlyq derlik joǵary oqý oryndarynda, kolledjder men mektepterde jóndeý jumystary aıaqtaldy. Daıyndyq 100 paıyzdy quraıdy.
«Qurmetti joǵary oqý oryndarynyń rektorlary, mektep, kolledj jáne mektep-ınternattarynyń dırektorlary, sizder balalardyń bilim alýy úshin jáne tárbıesi úshin qaýipsiz ári qolaıly jaǵdaı jasaýlaryńyz kerek. Balalar men qyzmetkerlerdiń densaýlyǵyn qorǵaýdy qamtamasyz etýde sapaly jáne tıimdi jumystar atqarýǵa, sondaı-aq oqý-tárbıe protsesin sapaly uıymdastyrýǵa mindettisizder», – dedi Aqtoty Raıymqulova.
Sondaı-aq bıylǵy jyl elimizdiń tarıhyndaǵy ataýly kúnderge toly. Olardyń qatarynda Qazaqstan Respýblıkasy Táýelsizdiginiń 30 jyldyǵy, Jambyl Jabaevtyń 175 jyldyǵy, Qajymuqan Muńaıtpasovtyń 150 jyldyǵy, Muqaǵalı Maqataevtyń 90 jyldyǵy bar. Mınıstr Otanymyzdyń tarıhı jetistikterin keńinen aqparattyq nasıhattaýdy damytýdyń ýaqyty kelgenin tilge tıek etti.
Kezdesý sońynda departament basshysy mınıstrlikke baǵynysty uıymdardyń ókilderi qoıǵan suraqtarǵa jaýap berdi jáne jetekshilik etetin vıtse-mınıstrlerge bekitilgen nysandardaǵy epıdemıologııalyq qaýipsizdik máselelerin baqylaýda ustaýdy tapsyrdy.