Aqtoty Raıymqulova: Jańa álipbıge kóshý — qazaq tiliniń ómirsheńdigin arttyrady
Til forýmyna elimizdiń barlyq óńirinen 250-den astam ókil, QR Parlamentiniń depýtattary, memlekettik organ, ulttyq kompanııa basshylary, zııaly qaýym ókilderi jáne bilim, ǵylym, bıznes, BAQ, sondaı-aq basqa da sala mamandary qatysýda.
Mádenıet jáne sport mınıstri Aqtoty Raıymqulova qazaq tili álipbıin latyn grafıkasyna 2025 jylǵa deıin kezeń-kezeńmen kóshirý jónindegi is-sharalar josparynyń aıasynda tıisti jumystar atqarylyp jatqanyn atap ótti.
«Ásirese, tilimizdiń qoǵamdaǵy qyzmetin arttyryp, onyń áleýetin kóterý isi bizdiń jiti nazarymyzda. Jańa álipbıge kóshý – jahandaný jáne ulttaný úderisindegi qazaq tiliniń ómirsheńdigin arttyratyn reforma. Osy reformany júzege asyrý barysynda mindetterdi aıqyndaý jáne atqarylǵan jumys nátıjelerin nasıhattaý – rýhanı ári saıası mańyzdy faktorlardyń biri. Álipbı reformasynyń jalpyhalyqtyq sıpat alý tektikterin iske qosý – búgingi kúnniń ózekti máselesi. Onyń joldaryn anyqtaý, Qazaqstandaǵy jáne álemdik tildik qaýymdastyqtaǵy qazaq tiliniń róli men mártebesi týraly zamanaýı bilim, aqparat, nasıhat alańdarynyń jumysyn uıymdastyrý - búgingi forýmnyń mindeti», - dedi Mádenıet jáne sport mınıstri.
Óz kezeginde «Til-Qazyna» ulttyq ǵylymı-praktıkalyq ortalyǵynyń bas dırektory Álibek Asqar jaqynda Memleket basshysy Qasym-Jomart Toqaev Mádenıet jáne sport mınıstri Aqtoty Raıymqulovaǵa jańa álipbıdi jetildirý jóninde tapsyrma bergenin eske saldy.
«Bul baǵytta ǵalymdarmen birlesip, tııanaqty jumysty ary qaraı jalǵastyratyn bolamyz», - dedi ortalyqtyń bas dırektory.
Sonymen qatar, Álibek Asqar myrza óńirlerdegi til basqarmalarynyń jumysyna qatysty óziniń pikirin aıtty.
«Qazaqtyń kósegesin bir kógertse, osylar kógertedi-aý dep óńirlerdegi til basqarmalaryna úmit artýshy edik. Optımızatsııa degen bále shyqsa boldy, óńir basshylary eń aldymen til basqarmalaryna shúıligedi eken, ıaǵnı aldymen til basqarmasyn qysqartýǵa umtylady. Qazir 9 oblys pen respýblıkalyq dárejedegi qalalarda ondaı basqarma atymen joq. Atap aıtqanda, basqa bólimdermen aralasyp ketken nemese múldem quryǵan. Eshqandaı quqyǵy da joq, aıtar sózi ótpeıdi», - dedi ol.
Osy oraıda ol til tóńireginde qalyptasqan mundaı jaǵdaı zııaly qaýymdy ǵana emes, barsha jurtshylyqty alańdatatynyn atap ótti.
Aıta keteıik, forýmnyń sektsııa jumystary «Ǵylym, bilim jáne til», «Bıznes jáne til», «Zań jáne til», «BAQ jáne til», «Memlekettik til bolashaǵy – jastar bolashaǵy», «Óńirlerdegi tildik ahýaldy taldaý» taqyryptaryn qamtydy.