Aqtoty Raıymqulova zańǵa «basym týrıstik aýmaq» uǵymyn engizýdi usyndy

NUR-SULTAN. QazAqparat – Mádenıet jáne sport mınıstri Aqtoty Raıymqulova májilismender aldynda QR keıbir zańnamalyq aktilerine týrıstik qyzmet máseleleri boıynsha ózgerister men tolyqtyrýlar engizý týraly zań jobasyn qorǵady, dep habarlaıdy QazAqparat tilshisi.

Mınıstrdiń aıtýynsha, zań jobasy eldiń qabyldanǵan strategııalyq qujattaryna sáıkes, týrıstik salany memlekettik retteýdi jetildirýge, sondaı-aq uzaq merzimdi kezeńge arnalǵan Qazaqstannyń ekonomıkalyq damý basymdyqtarynyń biri retinde týrızm salasyn damytý úshin qajetti quqyqtyq baza qurýǵa baǵyttalǵan.

«Zań jobasymen qoldanystaǵy zańnamalarǵa birqatar baǵyt boıynsha túzetý engizý josparlanyp otyr. Atap aıtqanda uǵymdyq apparatty jetildirý, týrızmdi jikteý, salany memlekettik qoldaýdy quqyqtyq retteýmen baılanysty normalardy qaıta qaraý kózdelgen. Memlekettik retteý, ataýly memlekettik qoldaýdy júzege asyrý turǵysynan mańyzdy máseleniń biri - týrıstik qyzmettiń qazirgi túrleri men baǵyttaryn naqty jikteýdiń joqtyǵy. Osyǵan baılanysty týrıstik klasterdi damytýdyń strategııalyq josparyn, sondaı-aq týrıstik qyzmettiń jekelegen baǵyttaryn iske asyrý maqsatynda zań jobasynda týrızmdi jikteý kózdelgen», - dedi mınıstr.

Sondaı-aq mınıstr Basym týrıstik aýmaq (BTA) uǵymyn engizýdi usyndy.

«Basym týrıstik aýmaqty engizý – zań jobasynyń negizgi novellasy. Basym týrıstik aýmaq qurý maqsattary: sınergetıkalyq áser esebinen týrıstik naryqta aýmaqtyń básekege qabiletin arttyrý, týrıstik klasterge kiretin týrıstik uıymdar jumysynyń tıimdiligin arttyrý, resýrstardy (materıaldyq, zııatkerlik) týrızmdi damytýdyń neǵurlym perspektıvaly núktelerine shoǵyrlandyrý. Basym týrıstik aýmaq – týrıstik salaǵa ınvestıtsııa men halyqaralyq standarttardy engizýdi kózdeıtin is-sharalar kesheni. Aýmaqty (geografııalyq shekaralardy) QR Úkimeti aıqyndaıdy», - dedi ol.