Aqtoty Raıymqulova: Tótenshe jaǵdaıǵa baılanysty ótpegen is-sharalar qarjysy qaıtaryldy

NUR-SULTAN. QazAqparat – Qazaqstanda mádenı, buqaralyq jáne sporttyq sharalardyń ótpeı qalýynan únemdelgen qarjy respýblıkalyq bıýdjetke qaıtaryldy. Bul týraly Mádenıet jáne sport mınıstri Aqtoty Raıymqulova Ortalyq kommýnıkatsııa qyzmetinde onlaın rejımde ótken baspasóz máslıhatynda aıtty, dep habarlaıdy QazAqparat tilshisi.

«Karantın sharalaryna baılanysty únemdelgen qarajat týraly aıtar bolsaq, buǵan deıin aıtqanymdaı josparlanǵan mádenı jáne sporttyq sharalar bolmaı qalǵanyn bilesizder. Tipti búkil álem boıynsha iri sporttyq shara sanalatyn Jazǵy Olımpıada oıyndary, Paraolımpıada oıyndary da bolmaıtyn boldy. Álem chempıonattary da josparly merziminde ótpeı qaldy. Qazirgi tańda bizdiń sportshylar úıde jattyǵýda», - dedi mınıstr Aqtoty Raıymqulova.

Mınıstr elde mádenı buqaralyq sharalardyń bári de onlaın rejımge aýystyrylǵanyn jetkizdi.

«Shynynda da belgili soma únemdelip qaldy. ıAǵnı qarajat ońtaılandyrylyp, respýblıkalyq bıýdjetke berildi», - dedi Aqtoty Raıymqulova.