Aqtoty Raıymqulova «Slavıan bazary» baıqaýynyń jeńimpazyn quttyqtady

NUR-SULTAN. QazAqparat – Elimizdiń Mádenıet jáne sport mınıstri Aqtoty Raıymqulova halyqaralyq «Slavıan bazary» baıqaýynda bas júldeni jeńip alǵan otandasymyz, jas ánshi Rýhııa Baıdúkendi jeńisimen quttyqtady, dep habarlaıdy QazAqparat tilshisi.

«Biz Rýhııany jeńisimen quttyqtaý úshin onlaın jınalyp otyrmyz. Jeńis qutty bolsyn! Rahmet saǵan. Rýhııa sen jas bolsań da óte talanttysyń. Sen Dımashtyń jeńisin qaıtaladyń, onyń saǵan tálimger bolǵan eńbegi aqtaldy. Árıne, bul úlken óner men kásibı sahnanyń bastaýy ǵana», - dedi A. Raıymqulova ZOOM arqyly ótken baspasóz máslıhatynda.

Sondaı-aq, mınıstr jerlesimizdiń el úmit aqtap, Qazaqstannyń atyn álemge taǵy bir tanymal etkenin aıtty.

«Bul Rýhııa qatysqan birinshi baıqaý emes. Buǵan deıin de birneshe óner baıqaýlaryna qatysyp, jetistikterge jetip júr. Rýhııanyń ómirbaıanyna qarap otyrsaq, ol 2010 jyldan beri qaraı túrli baıqaýlardan jeńispen oralyp keledi. Jalpy óner súıer qaýym qazaqstandyq qatysýshylardy «Slavıan bazary» baıqaýynda únemi asyǵa kútip, zor qurmetpen qarsy alady. Al Rýhııa saǵan sáttilik tileımiz, aldaǵy ýaqytta basqa da álemdik sahnalardyń tórinen kóremiz dep senemin. Sen el úmitin aqtadyń», - dedi ol.

Buǵan deıin Rýhııa Baıdúkenniń Vıtebskide ótken «Slavıan bazary» baıqaýynyń gran-prı júldesin jeńip alǵanyn habarlaǵan bolatynbyz.

14 memleketten kelgen qatysýshy slavıan elinen shyqqan kompozıtordyń týyndysyn slavıan tobyna jatatyn tildiń birinde orkestrdiń súıemeldeýimen oryndady. Baıqaý nátıjesinde qazaqstandyq Rýhııa Baıdúkenova Gran-prı ıegeri atanyp, «Altyn lıra» músinshesimen birge 20 myń AQSh dollaryna ıe boldy.