Aqtoty Raıymqulova Ózbekstannyń Mádenıet mınıstrimen kezdesti
QR Mádenıet mınıstrliginiń baspasóz qyzmeti taratqan aqparatqa sáıkes, kezdesý barysynda mádenıet mınıstrleri eki el arasyndaǵy mádenı-rýhanı baılanystardyń shynaıy ári jalpyadamzattyq qundylyqtar negizinde berik damyp otyrǵanyn atap ótti.
Qazaqstan Respýblıkasynyń Mádenıet jáne sport mınıstri Aqtoty Raıymqulova 2018 jyl Qazaqstandaǵy Ózbekstan jyly joǵary deńgeıde atalyp ótkenine toqtaldy.
«Memleket basshysy Qasym-Jomart Toqaev eki el arasyndaǵy ekonomıkalyq, mádenı baılanystardyń nyǵaıyp otyrǵanyna zor baǵa beredi. Bıyl Ózbekstandaǵy Qazaqstan jyly baýyrlas elder arasyndaǵy qarym-qatynasty odan ári damytýǵa yqpal etip otyrǵany sózsiz. Sonyń nátıjesinde kóktemde eki el mınıstrleri ózara mádenı yntymaqtastyq negizinde bekitken baǵdarlamaǵa saı 220-dan astam is-shara ótti. El turǵyndary mádenıet, óner, ádebıet, ǵylym, týrızm salasyndaǵy mádenı jáne iskerlik baılanystardyń jańa úlgisine kýá boldy. Ózbekstandaǵy Qazaqstan jyly aıasynda Tashkentte mádenı is-sharalar áli de ótkizilýde. Onyń jarqyn mysaly retinde «Astana opera» memlekettik opera jáne balet teatrynyń «Abaı» operasyn, «Madam Batterflıaı» qoıylymyn sahnalaýy, «Saltanat» memlekettik bı ansambliniń «Qazaqkontsert» ujymynyń, Qazaqstannyń tanymal ánshileri Roza Rymbaeva men Maqpal Júnisovalardyń jeke kontsert berýi jáne basqa da qazaqstandyq óner ujymdarynyń óner kórsetýi der edim. 2020 jyl álemdik qaýymdastyq uly Abaıdyń 175 jyldyǵyn atap ótpekshi. Sonymen qatar, kıeli ózbek topyraǵynda Tóle bı men Áıteke bıdiń jáne de basqa tarıhı tulǵalardyń eskertkishteri bar. Bul eki el tarıhynyń tamyry tereńde ekendiginiń jarqyn mysaly. Túrki tildes eki eldiń mádenı baılanystary nyǵaıa túsetini meni qýantady. Aldaǵy ýaqyttarda dostyq kópiri berik bolatynyna senim zor», - dedi Aqtoty Raıymqulova.
Óz kezeginde Ózbekstan Respýblıkasynyń Mádenıet mınıstri Bahtıer Saıfýllaev Ózbekstannyń Qazaqstandaǵy jyly aıasynda atqarylǵan is- sharalarǵa joǵary baǵa berdi.
«Ózbekstannyń kıno kúnderi Qazaqstannyń birqatar qalalarynda, atap aıtsaq, Almaty, Taraz, Shymkent, Qyzylordada, Túrkistanda zor qoshemetpen ótti. Qazirgi tańda Ózbekstan astanasy Tashkent qalasyndaǵy kóptegen mektepterde dombyra synyby ashylǵan. Onda qazaq dıasporasynyń mektep oqýshylarymen qosa jergilikti ult ókilderi de dáris alýda. Sonymen birge, Ózbekstannyń mádenıet, óner, teatr, estrada maıtalmandaryn Qazaqstan jurtshylyǵy zor qurmetpen qarsy alǵanyna shynaıy alǵysymdy jetkizemin. Kóktemdegi kezdesýde qabyldanǵan is-sharalar josparyndaǵy 85 baptyń barlyǵy, naqtylaı ketsem bul 220 is-shara joǵary deńgeıde atqaryldy. Munyń ózi tamyry bir týys eldiń bir-birine qushaǵy ashyq, kóńili aq, peıili darhan ekendiginiń aıǵaǵy. Mádenıet salasyndaǵy yntymaqtastyq eki el prezıdentteriniń kezdesýi aıasynda aldaǵy ýaqytta da júzege asatynyna senimdimin. Qazaqstanda bıyl Jastar jyly aıasynda, Sizdiń mınıstrliktiń uıymdastyrýymen kúni keshe ǵana AQSh tórinde Dımash Qudaıbergenniń tamasha kontserti ótti, qutty bolsyn aıtamyn», - dedi Bahtıer Saıfýllaev.
Eske sala keteıik, erteń Tashkentte Qazaqstan jylynyń resmı jabylýy ótedi. Sol kúni Aqtoty Raıymqulova Tashkentte taý shyńǵysy kýrortynyń saltanatty ashylý rásimine qatysyp, týrızm salasy boıynsha birlesken memorandýmǵa qol qoıady. Al keshkisin eki el mádenıet mınıstri Forýmdar saraıynda ótetin Qazaqstannyń Ózbekstandaǵy jylynyń resmı jabylý saltanatyna qatysady.