Aqtoty Raıymqulova: Otanyna qaıtarylǵan ár týrıst jiti tekserýden ótti

NUR-SULTAN. QazAqparat – Mádenıet jáne sport mınıstri Aqtoty Raıymqulova qıyndyq týǵyzǵan qazaqstandyq týrısterdi elge qaıtarý jumysy qalaı atqarylǵanyn aıtyp berdi, dep habarlaıdy QazAqparat tilshisi.

«Búgingideı shtattan tys jaǵdaıda shet memleketterde júrgen demalýshylarǵa qoldaý kórsetý maqsatynda 2016 jyly Úkimettiń qaýlysymen «Týrıstik Qamqor» qory qurylǵan bolatyn. Týrıstik qyzmetterdi usyný sharttary árqashan ýákiletti organnyń baqylaýynda. Mine, osyndaı keshendi is-sharanyń arqasynda biz elde tótenshe jaǵdaı jarııalanǵan tusta shet elge shyqqan 5 913 týrısti der kezinde elge qaıtardyq», - dedi mınıstr OKQ-da ótken baspasóz máslıhatynda.

Mınıstrdiń aıtýynsha, elge qaıtarylǵandardyń 1 823-i josparly túrde qaıtarylsa, 3 748 týrıst arnaıy uıymdastyrylǵan 19 charterlik reıspen elge jetkizilgen. Taǵy 342 adam sheteldik áýe tasymaldaýshylarymen kelisip, arnaıy ushaqtarmen qaıtarylǵan.

«Bul rette memlekettiń óz azamattaryna degen erekshe qamqorlyǵyn aıta ketý kerek. Elge jetkizilgen ár týrıst Qazaqstannyń sanıtarlyq qyzmeti bekitken erejelerge sáıkes tekserýden ótti», - dedi ol.