Aqtoty Raıymqulova lotereıa operatorynyń jalpy aınalymdaǵy qarjysy týraly aıtty
Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine lotereıalar jáne lotereıa qyzmeti máseleleri boıynsha ózgerister men tolyqtyrýlar engizý týraly» zań jobasy qaraldy.
«Zań jobasy lotereıalyq qyzmetti quqyqtyq retteýdi jetildirýge baǵyttalǵan. Sizderge belgili, «Lotereıalar jáne lotereıa qyzmeti týraly» Zań 2016 jylǵy 9 sáýirde qabyldanǵan bolatyn jáne búgingi ýaqytta zańnama deńgeıinde óz sheshimin qajet etetin, biraz máseleler anyqtaldy. 2017 jylǵy № 48 Úkimet qaýlysymen «Sátti Juldyz» Aktsıonerlik qoǵamy lotereıa operatory bolyp 15 jyl merzimge anyqtaldy. Lotereıa operatory qyzmetkerleriniń sany 748 adamdy quraıdy. Respýblıka boıynsha 3 myńǵa jýyq taratýshy (agentter) shaǵyn jáne orta kásipkerlerden turady. Olarmen kelisimsharttar negizinde jumys júrgiziledi, ıaǵnı lotereıa operatory lotereıanyń durys júrgizilýine jáne taratylýyna tikeleı ózi jaýap beredi. Sondaı-aq lotereıa bıletterin taratýdy óziniń negizgi qyzmetterimen qatar atqaratyn iri dıstrıbıýterler bar. Mysaly, «Qazpochta» Aktsıonerlik qoǵamy jáne iri sýpermarketter jelisi», - dedi mınıstr.
Taratýshylar (agentter) lotereıa operatorynan jalpy taratylǵan lotereıa bıletteriniń qunynan 6 paıyzdan joǵary syıaqy alady. «Sátti Juldyz» Aktsıonerlik qoǵamy 24 jedel (onyń ishinde 18-i elektrondyq) jáne 8 tırajdy lotereıa oıynyn (onyń ishinde 4-i elektrondyq) júzege asyrady.
«Sátti Juldyz» Aktsıonerlik qoǵamy 2017-2019 jyldar aralyǵynda lotereıa bıletterin satýdan túsken jalpy aınalymy 18,5 mlrd teńgeni qurady: 2017 jyly – 195,6 mln teńge, 2018 jyly – 1,9 mlrd teńge, 2019 jyly – 16,4 mlrd teńge. Lotereıa operatorynyń jalpy aınalymynyń 70 paıyzy lotereıa qatysýshylaryna tólenedi, qalǵan 30 paıyzy qosymsha qun salyǵyna (12%), agentterdiń syıaqysyna (6%), lotereıa bıletterin shyǵarý jáne marketıng shyǵyndaryna (5,7%), ákimshilik shyǵystaryna (4,1%) jáne sportty damytýǵa arnalǵan tólemderge (2,2%) jumsalady», - dedi A. Raıymqulova.
Lotereıa operatorymen 2,7 mlrd teńge kóleminde salyq, 421,7 mln teńge sportty damytýǵa arnalǵan tólemder jáne 12,1 mlrd. teńge utystar ýaqytyly tólendi.