Aqtoty Raıymqulova elordadaǵy mektep aýlasyna aǵash otyrǵyzdy

NUR-SULTAN. QazAqparat - QR Mádenıet jáne sport mınıstri Aqtoty Raıymqulova Nur-Sultan qalasyndaǵy №57 mektepte ótken ekologııalyq saǵatqa qatysty, dep habarlaıdy QazAqparat tilshisi.

Respýblıkanyń barlyq mektepterinde ótip jatqan aktsııany qoldaýǵa atsalysqan A.Raıymqulova aldymen, bilim ordasynyń jumysymen tanysyp, oqýshylar aldynda sóz sóıledi. «Ár sekýnd saıyn 887 plastıkalyq bótelke tastalady. Al bir plastıkalyq bótelkeni ydyratý úshin 700 jyl qajet. Sondyqtan plastıkalyq paketterdiń ornyna eko-sómkelerdi paıdalaný kerek», - dedi Mádenıet jáne sport mınıstri.

A.Raıymqulova oqýshylardy tabıǵatqa osy bastan janashyrlyqpen qaraýǵa shaqyrdy.

Budan keıin ol mekteptiń kitaphanasynda eko-sabaq ótkizdi. Balalarǵa tabıǵattyń adam ómirindegi mańyzy týraly áńgimelep, jer, sý, aýany saqtaý jaıynda keńesterin aıtty. Ekologııaǵa degen jaýapsyzdyqtyń saldary sóz bolǵan jıynda balalar da mınıstrge óz saýaldaryn qoıyp, ashyq pikir almasty. «Biz barynsha energııa men sý shyǵyndaryn azaıtýǵa atsalysýymyz kerek. Óıtkeni, qazirgi ýaqytta sýǵa degen suranys halyq sanyna qaraǵanda 2 ese jyldam ósýde», - dedi A.Raıymqulova.

Osydan keıin vedomstvo basshysy oqýshylarmen birge mektep aýlasyna aǵash otyrǵyzdy. Bul rette A.Raıymqulova balalarǵa tabıǵattyń eń mańyzdy elementi sanalatyn aǵash otyrǵyzýdyń paıdasy jaıly aıtyp berdi. «Bir aǵash 2 lıtr ottegin óndire alady. Al bul bir adam úshin 3 kúnge jetetin aýa. Tabıǵatqa jany ashyǵan ǵalamshardyń ár turǵyny jylyna keminde 14 aǵash otyrǵyzýy tıis», - dedi Mádenıet jáne sport mınıstri.