Aqtoty Raıymqulova Dúnıejúzilik týrızm uıymynyń bas hatshysymen kezdesti
Atalǵan mınıstrlik málimetinshe, ınvestıtsııalyq jobalardy iske asyrýda qoldaý kórsetý, kásibı gıdterdi daıarlaý, UNWTO baǵdarlamasy aıasyndaǵy Uly Jibek joly boıynsha áriptestik baılanysty nyǵaıtý – atalǵan máseleniń barlyǵy UNWTO Bas hatshysynyń byltyrǵy naýryzda elordaǵa sapary kezinde talqylanǵan.
Osyǵan oraı kezdesý barysynda mınıstr sodan beri elimizdiń týrızm salasynda oń ózgeris bolǵanyn atap ótken. Bıylǵy jyldyń mamyr aıynda týrızm salasyn damytý boıynsha 2019-2025 jyldarǵa arnalǵan memlekettik baǵdarlamasy qabyldandy. Baǵdarlama alǵashqy jemisterin bere bastady: el úkimeti vızalyq kóshi-qon rejımin lıberalızatsııalaý boıynsha aýqymdy jumys atqaryp, nátıjesinde bıyldan bastap 12 eldiń azamattary Qazaqstanda 30 kúnge deıin vızasyz júre alady. Elimizdegi 9 qalanyń áýejaılarynda «Ashyq aspan» rejımi iske asatyn boldy, «Tax free» júıesi boıynsha pılottyq joba júzege asyrylady. Qazaqstan budan ári de iskerlik týrızmdi ilgeriletýdi kózdep otyr: elimiz halyqaralyq ITB-Eurasia týrıstik kórmesin turaqty túrde uıymdastyryp, ony TMD elderi arasynda eń iri sharaǵa aınaldyrý josparda bar.
«Qazirgi zaman jıhankezine Qazaqstannyń usynatyny kóp. Elimizdiń tumsa tabıǵaty, halqymyzdyń salt-dástúri men baı mádenı murasy kez kelgen týrıstiń qyzyǵýshylyǵyn týdyratyny anyq. Osyny negizge ala otyra, eko-, etno-týrızm jáne oqıǵalyq týrızmdi damytý qolǵa alynǵan. Cebebi qazir bul týrıstik naryqtaǵy joǵary suranysqa ıe segmentter sanalady», - dedi Aqtoty Raıymqulova.
Óz kezeginde, UNWTO bas hatshysy Zýrab Pololıkashvılı Qazaqstannyń astanasy áldeqashan halyqaralyq iskerlik destınatsııaǵa aınalǵanyn atap ótti. UNWTO-nyń XVIII Ǵalamdyq Sammıtiniń Nur-Sultan qalasynda ótýi osynyń aıqyn dáleli.
«Týrızmniń birneshe baǵytyn qatar damytýda Qazaqstannyń alǵan baǵyt-baǵdary durys. Týrıstik salany damytý maqsatynda ulttyq kompanııanyń qurylýy, sheteldik týrısterdi kóptep tartý jáne ishki týrızmdi yntalandyrý úshin memlekettik baǵdarlamanyń qabyldanýy, sondaı-aq UNWTO-men tyǵyz baılanys ornatýǵa umtylýy - osynyń barlyǵy memlekettiń týrıstik áleýetin keńinen tanytýǵa ázir ekenin aıǵaqtaıdy», - dedi Zýrab Pololıkashvılı.
Qazaqstan men alqaly uıym arasyndaǵy áriptestik baılanystyń mańyzdylyǵyn eskergen Aqtoty Raıymqulova UNWTO qoldaý bildirse, Uly Jibek joly memleketteriniń týrızm mınıstrlerin elimizde qabyldaýǵa ázir ekendigin bildirdi. Sonymen qatar, UNWTO-nyń týrızm salasynyń mamandaryn daıarlaý boıynsha akademııalyq baǵdarlamasy qazaqstandyq taraptyń zor qyzyǵýshylyǵyn týdyrǵany jaıly aıtyldy. Sebebi, bıyl Qazaqstanda Halyqaralyq týrızm jáne qonaqjaılyq ýnıversıteti ashylǵan bolatyn. Sondaı-aq, basqosý barysynda mınıstrliktiń UNWTO-men aradaǵy birlesken jumys jasaý bolashaǵy talqylandy. Onyń ishinde, halyqaralyq uıym quramyndaǵy qazaqstandyq ókildiktiń ashylýy jáne 2022 jyly UNWTO Bas assambleıasynyń XXV sessııasyn Qazaqstanda ótkizý máselesi qarastyryldy.