Aqtoty Raıymqulova dańqty balýan Qajymuqannyń 150 jyldyǵynyń ashylý rásimine qatysty
Jıynda sóz alǵan Aqtoty Raıymqulova aty ańyzǵa aınalǵan tulǵanyń mereıtoıyn mınıstrlik respýblıkalyq deńgeıde atap ótýge daıyndalyp jatqandyǵyn, arnaıy is-sharalar jospary daıyndalǵanyn aıtty.
«Qajymuqan atamyz - bar ǵumyryn kúres ónerine arnap, kózi tirisinde ańyzǵa aınalǵan azamat. Keı derekterge sensek, balýan babamyz kúrestiń birneshe túrinen 54 memlekette kúresip, 48 medal oljalaǵan. Sonymen qatar Qajymuqan Muńaıtpasuly el esinde bozkilem tórindegi balýandyǵymen qatar, dombyra shertip, án salǵan segiz qyrly, bir syrly tulǵa retinde qalǵan. Batyr babamyzdyń 150 jyldyǵy osy jyly respýblıka aýmaǵynda atap ótiledi. Búgin álemdi alańdatqan pandemııaǵa baılanysty saltanatty ashylý rásimin keń kólemde atap ótý múmkin bolmaı otyr. Desek te, buǵan qaramastan babamyzdyń 150 jyldyǵy laıyqty, joǵary deńgeıde merekelenedi. Qajymuqan Muńaıtpasulynyń esimin ulyqtaý, máńgilik este qaldyrý maqsatynda arnaıy respýblıkalyq is-sharalar jospary ázirlendi. Búginnen bastap respýblıkamyzdyń barlyq óńirinde túrli is-sharalar ótkiziledi. Osy sátti paıdalana otyryp, barshańyzdy bir kisideı atsalysýǵa shaqyramyn», - dedi mınıstr.
Іs-shara aıasynda belgili sportshy Sergeı Tsyrýlnıkov, Tımýr Sypataev sekildi elimizge tanymal zor kúsh ıeleri óner kórsetti. Óz kezeginde Sergeı Tsyrýlnıkov ótken ǵasyr palýandarynyń murasyn jańǵyrtý mańyzdylyǵyna toqtaldy.
«Mereıtoıdyń maqsaty – óskeleń urpaqtyń boıyna ata-babalarymyz amanattap ketken qasıetterdi sińirý. Ótken ata-babamyzdyń murasyn jańǵyrtyp, sonyń negizinde jastardy tárbıeleýge bolady. Sonymen qatar, elimizde buqaralyq jáne balalar-jasóspirimder sportyna asa mán berý mańyzdy. Sol jerden bolashaq chempıondar shyǵady. Mınıstrliktiń qoldaýymen men de osy baǵytty damytýdy josparlap otyrmyn», - dedi Sergeı Tsyrýlnıkov.
Іs-shara kezinde barlyq sanıtarııa-epıdemıologııa talaby qatań saqtaldy.