Aqtoty Raıymqulova Astana Marathon týraly: «Qola» mártebesi bar TMD-daǵy jalǵyz marafon

NUR-SULTAN. QazAqparat – QR Mádenıet jáne sport mınıstri Aqtoty Raıymqulova Astana Marathon-ǵa qatysty. Bul jaıynda mınıstr Instagram paraqshasynda jazdy, dep habarlaıdy QazAqparat.

«Búgingi jeksenbiniń tańyn halyqaralyq Astana Marathon-ǵa qatysýdan bastadym. Bıyl el Táýelsizdiginiń 30 jyldyǵyna oraılastyrylǵan dástúrli jelaıaqtar jarysynyń ashylýynda sóz sóılep, qatysýshylarǵa sáttilik tiledim. Marafon kezinde pandemııaǵa qaramastan barlyq karantın talaby saqtalyp, jyldaǵydaı joǵary deńgeıde uıymdastyryldy. Bıyl 5100 qatysýshy World Athletics uıymy tarapynan berilgen «qola» mártebesi bar marafonda kim myqtyny anyqtady. Aıta keteıin, Astana Marathon TMD aýmaǵynda dál osyndaı statýsqa ıe bolǵan alǵashqy, ári jalǵyz marafon sanalady», - dep atap ótedi mınıstr.

Onyń atap ótýinshe, qazaqstandyq marafonshylardy qalyptastyrýdy, elorda men elimizdiń ımıdjin ilgeriletýdi maqsat etken aýqymdy joba alǵash ótkizilgen 2009 jyldan beri elimizdegi túrli qaıyrymdylyq qorlar úshin 37,125,458.00 teńge jınaǵan.

«Osynaý ıgi joba sátti jalǵasa berýine tilektespin. Jalpy Astana Marathon-ǵa qatysýshylar, qyzyǵýshylar qatary jyldan-jylǵa artyp kele jatqany qýantady. Áýesqoılar úshin Boston marafonyna qatysýǵa, kásipqoılar úshin Olımpıada joldamasyn ıelenýge múmkindik beretin «Astana marafon» búginde erler men áıelder sanatynda resmı túrde Orta Azııadaǵy eń jyldam jarys atanyp otyr. Bul da uıymdastyrýshylardyń tabysty jumysynyń bir jemisi ekeni belgili», - dedi Aqtoty Raıymqulova.

Eske salsaq, buǵan deıin «Astana Marathon 2021» sporttyq sharasy bastalǵany jáne oǵan Shvetsııadan kelgen azamat qatysqany týraly habarladyq.