«Aqtolaǵaı» borly taýy mańynda barlaý jumysy júrgizilýi múmkin
Aqtolaǵaı borly taýy mańyna barlaý júrgizý úshin «West Precaspian Company» kompanııasy kelisimshartqa otyryp, jergilikti ákimdikke bardy. Sol kezde týrıstik kompanııa ókilderi men kópshilik arasynda narazylyq týyndap, Aqtóbe oblysy Baıǵanın aýdanynyń ákimdigi aryzdy keri qaıtardy.
«Negizi kompanııa lıtsenzııa alady. Keıin ákimdikke kelip, sol aýmaqtan jer ber dep suraıdy. Birinshi aryz keri qaıtaryldy. Qazir kompanııa belgilengen terrıtorııa kólemin azaıtyp, Aqtolaǵaıdan alshaq jerde barlaý júrgizý úshin qaıta ótinish túsirgen. «West Precaspian Company» barlaý kompanııasy alǵashynda 3063 sharshy shaqyrym jerge barlaý júrgizý úshin lıtsenzııa alǵan. Ol kezde barlaý jumystary Aqtolaǵaı shatqaly, taýynan 2 shaqyrym qashyqtyqta edi. Biz aryzyn keıin qaıtarǵannan keıin jer kólemin 1116 sharshy shaqyrym dep alyp, Aqtolaǵaıdan 9 shaqyrym qashyq bolý úshin qaıta qujat jasap jatyr. ıAǵnı, jer kólemi 36% kishireıip tur», - dedi Baıǵanın aýdanynyń ákimi Qaırat Otarov.
Aqtolaǵaı borly taýy 2006 jyly QR Úkimeti bekitken erekshe qorǵalatyn aýmaq tiziminde bar. Arada 17 jyl ótkenimen shekarasy bekimedi, pasporty da joq. «West Precaspian Company» kompanııasyna aýmaq bólingen kezde bos jer retinde qaralǵan.
«Ekologııa departamenti terrıtorııany naqty anyqtaý kerek dep talap qoıyp otyr. Qazir kompanııa barlaýǵa ruqsat bergen ekinshi tarapqa hat jazdy. Sheshimdi 29 qyrkúıekke deıin qabyldaıdy. Talap boıynsha Aqtolaǵaıdyń respýblıkalyq nemese oblystyq mańyzdy aýmaqqa kiretini belgilenýi tıis. ıAǵnı, ǵylymı negizdemesi bolýy kerek. Qandaı ań-qus mekendeıdi, ósimdikteri týraly. Keıin tehnıkalyq-ekonomıkalyq negizdeme jasalýy kerek. Kim qorǵaıdy, qansha ınspektor degen suraqtar da bar»,- dedi Aqtóbe oblystyq ekologııa departamentiniń basshysy Erbol Qýanov.
Onyń sózinshe, pasportty jergilikti ákimdik, oblystyq tabıǵı resýrstar jáne tabıǵatty paıdalanýdy retteý basqarmasy nemese mınıstrlik jasaýy tıis.
«Bizde pastort joq. Aqtolaǵaı sońǵy 2-3 jylda ǵana tanyla bastady. Oǵan deıin tek jerligikti adamdar bildi. Pasportty qalaı jasaý kerek ekenin jer bóliminen anyqtap bileıin. Negizi barlaý jumystary Mııaly aýyldyq okrýgine qaraı júrgiziledi. Taýdyń baýraıynda jasaı almaıdy. Tek jalpy kartaǵa kirip ketip tur. Ázir jerdi bermeı, keri qaıtaryp otyrmyz. Eger terrıtorııasy qaıta anyqtalyp, ózgerse, biz zańdy túrde keri qaıtarýǵa quqyǵymyz joq. Biz onda berýimiz kerek», - dedi Baıǵanın aýdanynyń ákimi Qaırat Otarov.
Eske salsaq, týrısterdiń súıikti mekeni Aqtolaǵaıdan munaıdyń kólemin anyqtaý úshin barlaý jumystary bastalmaq edi. Kópshiliktiń qarsylyǵynan soń aryz keri qaıtaryldy.