Aqtoǵaı stantsııasyn týrıstik oshaq retinde damytý qajet - Arystanbek Muxamedıuly

ASTANA. QazAqparat - Jergilikti bılik Aqtoǵaı stantsııasyn týrıstik oshaq retinde qarastyryp otyrǵan joq. Ol jer óndiristik aımaq bolyp qala beredi. 

Sebebi mys kenin óndirý jumysy qolǵa alynǵan. Alaıda QR Mádenıet jáne sport mınıstri Arystanbek Muxamedıuly Aqtoǵaıdy týrıstik oshaq retinde damytý qajet dep sanaıdy, dep xabarlaıdy QazAqparat tilshisi.

"Máselen, Reseıden keletin týrıster Balqash, Alakól jáne taǵy basqa jerlerge barý úshin Aqtoǵaıdan túsip, basqa poıyzdarǵa otyrady. Sonda barlyǵy shaǵymdanady. Óıtkeni Aqtoǵaıda eshteńe joq. Vokzal da, ınfraqurylym da, qaýipsizdik te joq. Mine, dál osy sebepke baılanysty týrısterdiń kóbisi Qazaqstanǵa kelmeıdi. Aqtoǵaı bizge óte qajet, ony týrıstik ári tranzıttik xab retinde damytqan mańyzdy", - dedi Muxamedıuly otandyq týrızmdi damytýǵa arnalǵan jıynda. Mınıstrdiń aıtýynsha, Aqtoǵaı stantsııasyn retke keltirse, Reseıden keletin týrısterdiń sany úsh ese kóbeıedi.

Aıta keteıik, Aqtoǵaı stantsııasy Shyǵys Qazaqstan oblysynda ornalasqan. Poıyzdardyń basym bóligi dál osy stantsııa arqyly ótedi. Al Qazaqstanǵa kórshi elderden keletin týrıster Aqtoǵaıǵa deıin baryp, sol jerden basqa poıyzdarǵa otyrady.