Aqtóbeniń sý basqan aımaqtaryna Túrkistan oblysynan 30 tonna gýmanıtarlyq kómek jiberildi

<p>TÚRKІSTAN. KAZINFORM - Qarǵyn sýdan zardap shekken turǵyndarǵa túrkistandyqtar kómek kórsetip jatyr. Alǵashqy kúnniń ózinde máslıhat depýtattary men jergilikti jomart azamattar eń qajetti jáne jolǵa jaramdy zattardy jınaqtap, birinshi júk kóligin Aqtóbege jetkizgen bolatyn.&nbsp;</p>

Búgin Túrkistan oblysynan gýmanıtarlyq kómek tıelgen ekinshi kerýen jolǵa shyqty. Onyń ishinde 30 tonnaǵa jýyq zat bar. Basym bóligi azyq-túlik, kıim-keshek, kórpe-tósek sekildi kúndelikti turmysqa qajetti zattar.

Foto: Túrkistan oblysy ákimdigi

Gýmanıtarlyq kerýendi Túrkistan oblystyq qoǵamdyq damý basqarmasynyń basshysy Erlan Kúzembaev shyǵaryp saldy. Ol ıgi iske úles qosqan Túrkistan óńiriniń jurtshylyǵyna, jastaryna, kásipkerlerine rızashylyǵyn bildirip, sý tasqynynan zardap shekken óńirlerge qoldaý kórsetý jumystary jalǵasatynyn jetkizdi. 

Foto: Túrkistan oblysy ákimdigi

Qazir Aqtóbe óńirinde Túrkistan oblysynan barǵan 5 erikti jas apat aımaǵynda jumys istep jatyr.

Foto: Túrkistan oblysy ákimdigi

Búgin qosymsha 10 belsendi jas attandy. Olar apatty qalpyna keltirý jumystaryna qatysyp, zardap shekken turǵyndarǵa kómek kórsetetin bolady.

Foto: Túrkistan oblysy ákimdigi

Aıta keteıik, elimizdiń birneshe óńirindegi sý tasqynyna baılanysty Túrkistan oblysy «Jastar resýrstyq ortalyǵy» ǵımaratynda 27 naýryzdan bastap gýmanıtarlyq kómek qabyldaıtyn shtab iske qosylǵan bolatyn. Sonymen birge Túrkistan oblysynyń barlyq aýdan, qalalarynda shtabtar ashylyp, turǵyndardyń kómekterin qabyldaýda.