Aqtóbeniń Quılys aýylyna Torǵaı ózeninen áli de sý kelip jatyr
Quılys aýylynyń turǵyndary men áskerıler, tótenshe jaǵdaılar qyzmetkerleriniń tasqyn sýǵa qarsy kúres jumysyn júrgizip jatqanyna aıdan astam ýaqyt ótti. Búgin sý aýyldyń ózge jaǵynan kelip jatyr.
- Qazirgi tańda Torǵaı ózeninen kelgen sý deńgeıi 1 metrden asty. Barlyǵy 8 tehnıka jumyldyryldy. Olar: 4 tıegish, 3 KamAZ jáne bir K700. Sondaı-aq, №20982 áskerı bóliminiń 40 áskerıi, órt sóndirý jáne avarııalyq-qutqarý jumysy qyzmetiniń 5 qyzmetkeri bar. Aýyl turǵyndaryn qosqanda mundaǵy adamdar sany – 80. Aýa raıynyń qolaısyzdyǵy, ıaǵnı, ekpindi jeldiń soǵýyna baılanysty mekteptiń artqy jaǵynda yza sý paıda boldy. Qazirgi tańda sol jerdi bógeý jumystary júrgizilip jatyr. Azyq-túlik jáne janar-jaǵarmaı, qaptar aýdan ortalyǵynan jetkizilýde. Erteń aýylǵa bir tonna janar-jaǵarmaı jáne 5 myńnan astam qap jiberiledi, - dep habarlady Yrǵyz aýdanynyń ákimdigi.
Eske salsaq, Aqtóbe oblysynyń Yrǵyz aýdanynda tasqynǵa qarsy kúres jumysy jalǵasyp jatyr. Munda 8 sáýir kúni tótenshe jaǵdaı jarııalandy. Úsh aýylda úılerge sý kirse, Quılys jáne Jaısańbaıda bógetterdi nyǵaıtý jumysy júrgizilip jatyr.