Aqtóbeniń Keńqııaq aýylynda zańsyz júrgen sheteldikter elden shyǵaryldy

<p>AQTÓBE. KAZINFORM - Temir aýdany Keńqııaq aýylynda jumys isteýge ruqsaty joq 15 sheteldik anyqtaldy. Olar mektep qurylysyna tartylǵan.</p>

Aqtóbe oblystyq PD baspasóz qyzmetiniń habarlaýynsha, ​zańsyz jumys istep júrgen sheteldikterdi Temir aýdandyq polıtsııa bóliminiń ýchaskelik polıtsııa ınspektory anyqtady. 

- Kórshi eldiń azamattary mektep salýmen aınalysqan. Sheteldikter polıtsııa bólimine jetkizildi. Olarǵa ákimshilik hattamalar toltyrylyp, sot sheshimimen elden shyǵaryldy. Sondaı-aq, sheteldik jumys kúshin zańsyz tartqan kásipkerge de hattama toltyryldy,- dep habarlady Aqtóbe oblystyq Polıtsııa departamenti baspasóz qyzmetiniń jetekshisi Erbolat Sarqulov.

Aıta keteıik, Keńqııaq aýylynda 600 oryndyq mektep qurylysy byltyr bastalyp, birneshe ret toqtap qaldy. Jospar boıynsha qurylys jumysy bıyl aıaqtalýy tıis. Munda ázirge tek irgetasy qalanyp jatyr.

«Byltyr 17-tamyz kúni qurylys bastalǵan. Jumysshylar sany az, tehnıka az, uıymdastyrý deńgeıi tómen. Muny astanalyq «Antarium Group» JShS salyp jatyr. Bul kompanııa tek bir emes, 4 mektep qurylysyn óz mindetine alǵan. Olar: Aqtóbe qalasy Altyn orda aýdanynda 900, Keńqııaqta 600 oryndyq mektep. Sonymen birge osy kompanııanyń Shubarqudyq aýyly men Qandyaǵash qalasyndaǵy qurylysy da problemaly bolyp tur. Áli de jyl sońyna deıin bitiremiz dep ýáde berip otyr,- dedi Aslan Jarasbaev.