Aqtóbeniń Yrǵyz aýdanyndaǵy úsh aýylda sý deńgeıi túspeı tur

<p>AQTÓBE. KAZINFORM &ndash; Yrǵyz aýdanynyń Nura, Mamyr, Belsher aýyldaryndaǵy sý deńgeıi túsken joq. Bul aýdanǵy úsh aýylda 80-nen astam úıge sý kirgen.</p>

Aqtóbe oblysy Yrǵyz aýdanynda áli de qaýip seıilgen joq. Munda 8 sáýir kúni tótenshe jaǵdaı jarııalanyp, bir aptadan soń ózen boıyndaǵy aýyldarǵa sý kirdi. Shuǵyl evakýatsııalaý jumysy Quılys aýylynda da júrdi. Barlyǵy 1300-ge jýyq adam qaýipsiz jerge kóshirilgenimen, teń jartysyna jýyǵy týǵan-týysynyń úıinde júr.

«Belsherde 34 tútin bar. Onda 224 adam turady. 4 úı sý astynda qaldy. Sý basý qaýpi týyndaǵan sátte aýyldyń áıelderi men balalary, qarttary, barlyǵy 135 adam aldyn ala qaýipsiz jerge kóshirildi. Sonymen qatar 46 adam bógetti nyǵaıtý jumystaryna jumyldyrylyp, 100-den astam erikti jan kómek berdi. Hromtaý, Áıteke bı jáne Shalqar aýdandarynan qosymsha TJD qyzmetkerleri shaqyryldy. 3 traktor, 1 júk tıegish tartyldy. Qaýipsizdik maqsatynda elektr energııasy ajyratyldy. Aýylǵa generator kómegimen jaryq berilip, aınalma jol arqyly eldi mekenge qatynaýǵa bolady», - dedi Yrǵyz aýdanynyń ákimi Nurlan Qyzbergenov.

Onyń aıtýynsha, aýdandaǵy Nura aýylyna Torǵaı ózeninen sý kelip jatyr.