Aqtóbeniń eks-ákimi jazadan qutylý úshin tanysyna aqsha berip, aldanyp qaldy
Aqtóbe qalalyq sotynda Ermek Imantaevty aldap, odan aqsha men kompanııadaǵy úlesin alǵan Nurlan Baltaevqa Qylmystyq kodekstiń «Alaıaqtyq» baby boıynsha aıyp taǵylyp, is qaraldy.
Memlekettik aıyptaýshy Ásel Tanalıeva protsestik kelisimdi oqydy.
Іs materıalyna súıensek, 2007 jyly Baltaev ortaq tanysy Qudaıbergenov arqyly Ermek Imantaevpen tanysady. Keıin olardyń arasynda senimdi qarym-qatynas ornaıdy.
Imantaev 2019-2021jyldar aralyǵynda «Aqtóbe» ÁKK basqarma tóraǵasy qyzmetin atqardy.
Al 2021 jyly qazan-qarasha aılaryndy QR Sybaılas jemqorlyqqa qarsy is-qımyl agenttiginiń oblystyq departamenti QR Qylmystyq kodekstiń 361-baby jáne 189-baby boıynsha is qozǵalyp, tergeý júrgizdi.
Imantaev qylmystyq is týraly bilip, alańdap 2022 jyldyń kókteminde bárin tanysy Qudaıbergenovke aıtady. Al ol Baltaevqa habarlaıdy.
— Baltaev buryn quqyq qorǵaý salasynda jumys istegen. Ol aldaý jolymen aqsha jymqyrý úshin Imantaevqa Antıkor qyzmetinde tanysy bar ekenin aıtady. 100 mln teńge syıaqy berse, tanysymen sóılesip, isti toqtatý týraly kelise alatynyn jetkizedi. Óz kezeginde Imantaev Baltaevqa tanystary arqyly aqshany bólip-bólip berýge kelisti. Keıin Baltaev kelisimdi eske salyp, qaıta-qaıta telefon shalyp turady. 2022 jyldyń naýryz aıynan bastap 2023 jyldyń aqpan aıyna deıin Baltaevtyń banktegi esepshotyna jalpy sommasy 2 mln 419 myń teńge túsedi. 2022 jyldyń 14 naýryzy kúni Astana qalasynda prokýratýra Qylmystyq kodekstiń 189-baby boıynsha qylmystyq is qozǵaıdy. 2022 jyldyń jazynda Imantaev kýáger retinde, 2022 jyldyń tamyz aıynda osy is boıynsha aıyptalýshy retinde tirkeledi. Osy kezde Baltaev taǵy da habarlasyp, is qozǵalǵanyn esine salady, — dedi memlekettik aıyptaýshy Ásel Tanalıeva.
Ári qaraı Imantaev qylmystyq jaýapqa tartylmas úshin Baltaevqa «Kapıtal ınvestment grýpp» JShS-indegi negizgi kapıtaldyń 70% usynady.
Onyń naryqtaǵy baǵasy 100 mln teńgeden asady. Baltaev oǵan kelisedi.
— 2022 jyldyń 27 jeltoqsan kúni Aqtóbe qalasynda Qalıev pen Baltaev satý-satyp alý kelisimshartyna qol qoıady. Sóıtip Baltaev «Kapıtal ınvestment grýpp» JShS-niń 70% úlesin alady. Keıin Imantaevqa tanysy úshin qolma-qol aqsha kerek ekenin aıtyp, satyp berýin suraıdy. Imantaev «Kapıtal ınvestment grýpp» JShS-niń ekinshi quryltaıshysyna qalǵan 70% satyp alýdy usynady. Baǵasyn 50 mln teńge dep bekitedi. Satyp alýǵa kelisken kásipker aqshany tabý úshin ýaqyt surady. Keıin Imantaev tanysy Qalıev arqyly Baltaevqa 4 mln teńge beredi. Sol jerde qolhat jazylady. 2023 aqpan aıynda Imantaev tanystarynan 30 mln teńge qaryzǵa surap alady. Baltaevqa 30 mln teńge aqshany, oǵan qosa ózindegi 10 myń dollar qarjyny usynady. Baltaev barlyǵy 36 mln teńgeden astam aqsha, 10 myń AQSh dolaryn, «Kapıtal ınvestment grýpp» JShS-indegi 70% úlesin alady. Negizi komanııanyń naryqtaǵy quny — 178 mln teńge, — dedi memlekettik aıyptaýshy.
Prokýror protsestik kelisimge jasaý kezinde 5 jyl bas bostandyǵynan aıyryp, «Kapıtal ınvestment grýpp» JShS-degi 70% úlesti memleket paıdasyna tárkileýdi, jazasyn qylmystyq atqarý júıesindegi qaýipsizdigi ortasha mekemesinde óteýdi surady.
Kelesi sot otyrysy erteń bolady.
Eske salsaq, Aqtóbeniń eks-ákimi Ermek Imantaev Qylmystyq kodekstiń «senip tapsyrylǵan bótenniń múlkin ıemdený nemese talan-tarajǵa salý» baby boıynsha aıypty dep tanylyp, 8 jylǵa bas bostandyǵynan aıyryldy.