Aqtóbeniń birneshe aýylyna aparar joldy sý shaıyp, qatynas úzildi

<p>AQTÓBE. KAZINFORM - Aqtóbe oblysy Baıǵanın aýdanynyń Oımaýyt, Mııaly, Dııar aýyldaryna qatynas 22-naýryz kúni úzildi. Sonymen birge Áıteke bı aýdanynyń Taldyq aýylyna aparar joldy sý shaıdy.</p>

Aqtóbe oblysynyń ońtústik aýdandarynda qar erip, dala sýy aýylǵa kirip jatyr. Sonyń ishinde Jańajol aýyldyq okrýginiń Oımaýyt, Mııaly, Dııar aýyldaryna barar joldaǵy sý ótkizý qurylǵysy buzylyp, qatynas úzildi.

- Oımaýyt, Mııaly, Dııar aýyldarynda 10 kúnge jetkilikti azyq-túlik qory bar. Oımaýyt aýylynda ambýlatorııa, Mııaly, Dııar aýyldarynda medpýnktter jumys istep tur. Jedel járdem kómegin qajet etip jatqan adamdar joq, - dep habarlady Aqtóbe oblysy ákiminiń baspasóz qyzmeti.

Baıǵanın aýdany ákimdiginiń habarlaýynsha, 19 naýryz kúni aýdandyq mańyzy bar «Qaraýylkeldi-Jarqamys-Altaı batyr-Mııaly-Oımaýyt» baǵytyndaǵy avtomobıl jolynyń «Aşy aǵar» saıynda sý ótkizgish qubyr buzyldy. Eki kúnde buzylǵan jer qalpyna keltirilgenimen, arada 6 saǵat ótkende taǵy sý shaıyp ketti. Sodan beri aýdan ortalyǵynan úsh aýylǵa qatynas úzildi. Úsh aýylda qazir 1500 adam turady.

Sonymen birge Áıteke bı aýdany Qaıraqty aýyldyq okrýgi Taldyq aýylyna aparatyn jol buzyldy.

- Aýyl halyqnyń sany - 251 adam. Munda medıtsınalyq pýnkt bar. Emdeý orny alǵashqy medıtsınalyq kómek kórsetýge arnalǵan dári-dármekpen tolyqtaı qamtylǵan. Aýylda ornalasqan eki dúkende turǵyndar úshin qajetti azyq-túlik qory bar, - dedi Áıteke bı aýdanynyń ákimi Dáýletııar Toǵyzbaev.

Aıta keteıik, Aqtóbeniń Qojasaı-Jańajol baǵytyndaǵy jolda sý kóterilip, qatynas qıyndady.