Aqtóbeniń sý tasqyny bolǵan Qobda aýylynda jańa úıler salynady

AQTÓBE. QazAqparat – Aqtóbeniń Qobda aýylyna 24 úı salynady. Ázirge 75 otbasyna 500 myń teńge kóleminde qarjy berildi. Bul – bıýdjetten tys berilgen materıaldyq kómek, dep habarlaıdy QazAqparat tilshisi.

Aqtóbe oblysy Qobda aýdanynyń ortalyǵynda qazirgi kezde 79 úıge, 22 aýlaǵa sý kirgeni belgili boldy. Alǵashynda jergilikti ákimdik tek 51 úı týraly aıtqan edi. Zalaldy baǵalaý jónindegi komıssııanyń aldyn ala málimetterine sáıkes, 3 úı qalpyna keltirilmeıdi, 4 úıdiń qabyrǵalary qulaǵan. Olar apatty dep tanyldy. Áli kúnge deıin 17 úı sýda tur.

«Óńir basshylyǵy úsh otbasyǵa bıýdjetten tys qarajat esebinen turǵyn úı satyp alýdy josparlaǵanymen, eldi mekende bos turǵyn úı bolmaı shyqty. Soǵan baılanysty úı salý jóninde sheshim qabyldandy. Barlyǵy 24 úı salynady. Qazirgi ýaqytta eldi mekende sý tasqyny deńgeıiniń tómendeýi baıqalady. Jasandy sý jınaý, qum tóseý jáne sý aıdaý jumystary jalǵasyp jatyr. Komıssııa jumysy aıaqtalǵanǵa deıin zardap shekkenderdi qoldaý maqsatynda 75 otbasyǵa bıýdjetten tys qarajat esebinen 500 myń teńge mólsherinde materıaldyq kómek aýdarylady. Komıssııa barlyq ǵımarat pen qurylysty zerttegennen keıin zardap shekkender zalal somasyn tolyq kólemde alady», - dep habarlady Aqtóbe oblysy ákiminiń baspasóz qyzmeti.

Aıta keteıik, munda 38 mamandandyrylǵan tehnıka, 277 adam jumyldyryldy. Aýdanda 15 naýryzda jergilikti deńgeıde tótenshe jaǵdaı jarııalandy. Sonymen birge, úsh aýylda jaryq sóndi.