Aqtóbeniń shalǵaı aýylynda 5-8 synyp oqýshylary bir kabınette oqıdy

AQTÓBE. QazAqparat – Aqtóbeniń Baıǵanın aýdany Aqtan jyraý negizgi mektebinde tórt synyptyń oqýshylary birge oqyp júr. Bul bilim ordasyndaǵy 22 oqýshy nebary úsh synypqa shaq keledi, dep habarlaıdy QazAqparat tilshisi.

Baıǵanın aýdanynyń ortalyǵynan shalǵaı jatqan Qopa aýylynda Aqtan jyraý negizgi mektebi bar.

Onda qazir 22 oqýshy bilim alyp júr.

«Balalardyń úshin qıyn kez. 5-8 synyp oqýshylary bir synyp ishinde otyrady. Olarǵa 45 mınýtta tórt túrli taqyryp túsindirilýi tıis. Muǵalim qansha jerden myqty bolsa da ol múmkin emes nárse. Shynymdy aıtsam, balalardyń bolashaǵyna alańdaımyn. Bul jaıttan ákimdik te, bilim bólimi de habardar dep oılaımyn. Álem damyp, elimizdegi keıbir mektepter úsh tilde sabaq ótkizedi. Bizdiń balalar bári bir jerde otyryp, sabaq oqýǵa májbúr»,- dedi aty-jónin ataýdan bas tartqan aýyl turǵyny.

Negizgi mekteptegi bul jaıttan oblystyq bilim basqarmasy habardar. Tipti mundaı mektep oblystaǵy barlyq aýdanda bar dep otyr.

«Bastaýysh mektep bes oqýshydan bastalýy kerek. Al negizgi mektepte 41 oqýshy, orta mektepte 81 oqýshydan az bolmaýy tıis. Bul mektepte 22 oqýshy bolsa da tolyǵymen negizgi mektep bolyp otyr. Qazir úsh klass qana bar. Bul qoldanystaǵy zańnamaǵa saı. 1-4 synyp, 5-8 synyp oqýshylary biriktiriledi jáne 9-synyp óz aldyna bólek oqıdy. ıAǵnı, barlyǵy úsh synypqa biriktirilgen. Bizde ondaı 204 mektep bar. Onda 14 myńǵa jýyq bala oqıdy. Bizde 5 baladan bastalatyn mektepter de bar»,- dedi oblystyq bilim basqarmasy basshysynyń orynbasary Nurgúl Bertileýova.

Onyń aıtýynsha, joǵary oqý oryndary buǵan deıin qos pánniń dıplomyn bergen.

Al ondaı múmkindik bolmaǵan kezde aýyl mektepteriniń muǵalimderi arnaıy biliktiligin arttyrǵan.

«Aýyl úshin eń basty ol - mektep. Mektep bolmasa aýyldy ustap turý múmkin emes. Sondyqtan 5 bala bolsyn, 10 bala bolsyn mektepti jappaı otyrmyz. Bıyl Mártók aýdanynda 1 mektep jabyldy. Onda 5 bala oqydy. Oqý jylynyń basynda eki bala qonys aýdaryp, 3 bala qalǵan edi. Sondyqtan jabylyp, úsh bala aýdan ortalyǵyndaǵy ınternatqa aýystyryldy. Aqtóbeniń barlyq aýdanynda 5 bala oqıtyn mektep bar desem de bolady»,- dedi Nurgúl Bertileýova.