Aqtóbeniń ortalyǵynda tóbeles bolyp, er adam kóz jumdy

AQTÓBE. QazAqparat – Aqtóbe qalasynyń Ábilqaıyr han dańǵyly boıynda ornalasqan dámhana mańynda tóbeles bolyp, bir adam pyshaq jaraqatynan kóz jumdy. Qazirgi kezde kúdikti ustaldy, qamaýda otyr, dep habarlaıdy QazAqparat tilshisi.

Oqıǵa 3 shilde kúni saǵat 6:35-te tirkelgen. Aqtóbe qalasy PB jedel basqarý ortalyǵyna Ábilqaıyr han dańǵylyndaǵy №89 úıdiń janynda tóbeles bolyp jatqany týraly habarlama túsedi.

«Polıtsııa jasaǵy pyshaq jaraqatyn alǵan er adamdy tapty. Jedel járdem ony Aqtóbe qalasynyń kópsalaly aýrýhanasyna jetkizdi. Alaıda, jábirlenýshi alǵan dene jaraqatynan qaıtys boldy. Patrýldik polıtsııa qyzmetkerleri osy qylmysty jasady degen kúdikpen 37 jastaǵy er adamdy anyqtap, ustady. Qylmystyq kodekstiń «Kisi óltirý» baby boıynsha sotqa deıingi tergeý júrgizilip jatyr. Kúdikti ýaqytsha ustaý ızolıatoryna qamaldy», - dep habarlady oblystyq PD baspasóz qyzmetiniń jetekshisi Erbolat Sarqulov.

Aıta keteıik, ótken aptada óńirde 173 qylmys tirkelgen. Onyń ishinde 56-sy - jeke múlikti urlaý, 29-y - alaıaqtyq jáne 6 buzaqylyq deregi.

Eske salsaq, Aqtóbeniń Shalqar qalasynda stýdent oqýshynyń keýde tusynan teýip óltirdi. Abaısyzda bolǵan ólimnen soń qylmystyq is qozǵalyp, sottalýshy 8 jylǵa bas bostandyǵynan aıryldy. Sonymen birge, moraldyq shyǵyn retinde odan 10 mln teńge óndiriledi.