Aqtóbeniń barlyq aýdandarynda dene shynyqtyrý – saýyqtyrý kesheni salynyp jatyr
Aqtóbe qalasyndaǵy Trıatlon saıabaǵynda Sport kúni ótti. Oblys ákimi Ońdasyn Orazalın jınalǵandardy quttyqtady.
«Qazirgi ýaqytta sport qyzmetkerlerine, jalpy salaǵa aıryqsha kóńil bólinip keledi. Óńirdiń barlyq aýdanynda, shalǵaı jatqan aýyldarǵa deıin túrli baǵyttaǵy kóptegen zamanaýı sport nysandary qolǵa alynyp, qarapaıym sport alańdary salynyp jatyr. Bıyldyń ózinde Dene múmkindigi shekteýli adamdarǵa arnalǵan sport kesheni, fýtbol akademııasynyń qurlysy, ústel tennısi ortalyǵy sekildi iri jobalar, 5 dene shynyqtyrý-saýyqtyrý sport kesheni, 60-tyń ústinde sport alańdary boı kóteredi dep josparlap otyrmyz.
Sportshylarymyz keshendi oıyndarda ájeptáýir óner kórsetip, túrli deńgeıdegi jarystarda júldege ıe boldy. Kelesi jyl - Parıj Olımpıadasyna daıyndyq jyly. Biz aqtóbelik sportshylarǵa senemiz jáne úlken úmit artamyz»,- dedi oblys ákimi Ońdasyn Orazalın.
Trıatlon parkiniń alańynda Álem, Azııa jáne Qazaqstan chempıonattarynyń jeńimpazdary men júldegerleri, Olımpıada jáne Sýrdlımpıada oıyndarynyń qatysýshylary syndy tanymal sportshylar óner kórsetti. QR dene shynyqtyrý jáne sport salasynyń eńbek sińirgen qyzmetkerleri, QR Qurmetti qaıratkerleri, birtýar sportshylar, belsendi azamattar men dene shynyqtyrý jáne sport salasynyń qyzmetkerleri marapattaldy. Aqtóbelikter úshin grossmeısterlermen bir mezgilde shahmat seanstary, bı batldary, basketbol, sháınek kóterý, qol kúresi, gir kóterýden jarystar uıymdastyryldy.
Trıatlon parkine kelgen eń jas aqtóbelikterdi dzıýdo, erkin jáne grek-rım kúresi, sambo, qazaqsha kúres, djıý-djıtsý jáne basqa da sport túrlerinen kórsetken kórsetilimderi erekshe qýantty.