Aqtóbeniń ár aýdanynda azyq-túlik baǵasyna monıtorıng júrgizetin top jumys isteıdi
«Aqtóbe» telearnasynyń «Aqparattyq saǵat» baǵdarlamasynda búgin azyq-túlik qaýipsizdigi, baǵa monıtorıngi týraly sóz boldy. Oblystyq kásipkerlik basqarmasynyń basshysy Nurhan Tileýmuratovtyń aıtýynsha, óńirde taýar óndirýshilerdi qoldaý, azyq-túlik baǵasyn turaqtandyrý úshin aınalymǵa 1 mıllıard teńge bólindi. Bul qarjynyń kóbi nan óndirýshi kompanııalarǵa úlestirildi. Arnaıy komıssııa sheshiminen soń sút ónimderi (sút, aıran, súzbe), makaron ónimderi, jumyrtqa, unǵa baǵany turaqtandyrý josparlanyp otyr. «Áleýmettik mańyzy bar azyq-túliktiń óz tizimi bar. Máselen, maılylyǵy 2,5% bolatyn sút baǵasy ǵana baqylaýda. Qoraby da jumsaq bolýy kerek. Jergilikti taýar óndirýshilerde súttiń lıtri 245 teńgege bolyp tur qazir. Turǵyndarǵa sút jáne sút ónimderiniń barlyǵyna emes, arnaıy túrleriniń baǵasy ǵana baqylaýda bolatynyn eskertemiz», - dedi Nurhan Tileýmuratov. Onyń aıtýynsha, oblystaǵy baǵa turaqtylyǵyn qamtamasyz etý úshin barlyq aýdan men qalada monıtorıng toby jumys isteıdi. Máselen, qala boıynsha oblystyq kásipkerlik basqarmasy, oblystyq aýyl sharýashylyǵy basqarmasy men Aqtóbe qalasynyń Almaty jáne Astana aýdandarynyń ákimdikteriniń qyzmetkerleri kún saıyn azyq-túlik dúkenderin aralaıdy.
«Arnaıy montorıng toby kún saıyn Aqtóbe qalasy men aýdandardaǵy jaǵdaıdy baqylaıdy. Basty maqsaty – áleýmettik mańyzy bar taýar baǵasyn qaraý, turaqty bolýyn qamtamasyz etý. Qaladaǵy eki iri saýda jelisinde eshqandaı da zań buzýshylyq tirkelmedi. Olar áleýmettik jaýapkershilikti sezinip, tizimdegi azyq-túliktiń baǵasyna 15% emes, 5% ústemaqyny qosyp satyp otyr. Qazir Aqtóbe oblysynda 19 túrli áleýmettik azyq-túliktiń 17-i boıynsha baǵa respýblıkalyq kórsetkishten tómen», - dedi oblystyq kásipkerlik basqarmasynyń basshysy Nurhan Tileýmuratov.
Aqtóbe oblysynda sút óńdeıtin 4 tseh bar. Olardyń jalpy qýattylyǵy 44,9 myń tonnany quraıdy. Et óńdeıdiń 14 kásiporyn jumys isteıdi. Jalpy qýattylyǵy 43,9 tonna bolyp tur. 2025 jylǵa deıin aýyl sharýashylyǵy salasynda 315 mlrd teńgeni quraıtyn 75 ınvestıtsııalyq joba júzege asyrylady. Bıyl mal bordaqylaý alańy salynady. Taýarly-sút fermasy da boı kóteredi.
«Ósimdik maıyn óndiretin zaýyt bar. Oǵan qosymsha taǵy bir kompanııa byltyr jumysyn bastady. Bul Aqtóbe oblysynyń ishki naryǵyn ósimdik maıymen tolyq qamtamasyz etýge múmkindik beretin jobalar», - dedi oblystyq aýyl sharýashylyǵy basqarmasynyń basshysy Isataı Espaǵambetov.